admin
Amaqanda
Ziyabekela phela inkukhu lapha ekhaya amaqanda la sitshayana ngawo. Kungcono siwadle kulokuthi siwathengise.
Nxa siwadla azasivikela emikhuhlaneni njalo akhe lemizimba yethu.
Ungancitshi abantwana amaqanda, baphekele imihlobo eyehlukeneyo badle bakholise. Nanzi izindlela zokupheka ezehlukeneyo. Ziphekele lawe udle ukholise labemuli yakho.
Mock crab eggs
Okudingakalayo
– Itamatisi elikhulu.
– Ukhezo lokudla olulodwa lwemajarini.
– ½ inkomitsho itshizi egirethiweyo.
– Ukhezo lwetiye ihanyanisi egirethiweyo.
– Amaqanda amabili atshayiweyo.
– Isawudo le-cayenne pepper leminye imithikazana oyithandayo.
– Udengezi lokukhanzingela (frying pan).
– Imbiza lengqamu, uphini, izinkwa ezizincezu kumbe i-toast ezincezu.
– Inkomitsho elamanzi aqandayo.
– Itshukela ngengxenye yokhezo lwetiye.
Ukupheka
– Faka itamatisi emanzini abilayo okwemizuzwana nje.
– Hluba isigogo setamatisi sonke.
– Sika itamatisi iziqanyana.
– Faka imajarina kudengezi uyekele incibilike ngokutshisa.
– Khathesi faka izincezu zamatamatisi uzikhanzinge ngokuziphenduphendula.
– Khathesi thatha itshizi egirethiweyo uyifake phezu kwamatamatisi.
– Ngokunjalo faka ihanyanisi egirethiweyo.
– Hlola amaqanda ukuthi awabolanga, uwabulalele enkomitshini.
– Watshaye ngefologwe ahlangane.
– Khathesi thela phezulu kwakho konke okusodengezini amaqanda atshayiweyo.
– Pheka uphendula kuze kujiye kodwa kungatsheli.
– Vuvuzela isawudo, i-cayenne pepper lemithikazana ngokuthanda kwakho.
– Phinda njalo uvuvuzele itshukela .
– Pheka kuvuthwe.
– Khathesi dlana lokhu lezincezu zesinkwa kumbe izincezu ze-toast.
Nanzelela lokhu: Inhlama le ephekiweyo ungayilondoloza efirijini iviki yonke ube ulokhu uzidlela ngokuyifudumeza nxa usuyifuna.
Surprise Eggs (amaqanda amangalisayo)
Okudingakalayo
– Amaqanda amanengi angaba mabili emuntwini oyedwa.
– Inyama egayiweyo yaphekwa eyenkomo.
– Ulimi oluphekiweyo lwagaywa
– Inkomitsho ezinengi zokuphekisa.
– Udengezi lokuphekela.
– Isawudo, ibilebile lemithikazana.
– Ingxenye yokhezo lwetiye itshukela ngokuthanda kwakho.
Ukupheka
– Huqa inkomitsho zonke phakathi ngemajarini.
– Yehlukanisa amaqanda okumhlophe kufake enkomitshweni nganye, umthubi wufake kweyodwa inkomitsho.
– Tshaya umthubi uhlanganise lolimi lenyama yenkomo leyenkukhu yonke egayiweyo.
– Faka isawudo.
– Yenza kube yizidindilizi ukufake ngakunye ngakunye enkomitshini ezilokumhlophe kweqanda.
– Misa inkomitsho odengezini olulamanzi atshisayo upheke kuze kuvuthwe.
– Khupha kusatshisa udle ukholise, ngenye indlela yokupheka amaqanda.
Online Reporter