Online Reporter
ABALIMI sebexwayiswe ngokuqakatheka kokubhadalela izilimo zabo umshuwalensi ukuze bangalahlekelwa nxa sekuthe kwaba lenhlekelele.
Umlimisi uNkosazana Siphilisiwe Ndlovu weLupane ukhuthaze abalimi ukuba babe zingxenye zamashuwalensi (insurance) ehlukeneyo ukuze bavikele izilimo zabo kumthelela wokuguquka komkhathi.
Ekhuluma lentatheli uNkosazana Ndlovu uthe umshuwalensi uqakathekile kulabo abalimayo kunye labafuyileyo.
“Balimi asihambeni emabhanga siyejoyina imshuwalensi ukuze sivikele ukulahlekelwa yizilimo kumbe izifuyo zethu.
“Ungaba lomshuwalensi ungehlelwa luhlupho uyenelisa ukuya ebhanga kumbe kunkampani lapho obhadala khona bakusize.
“Kuqakathekile ukuba wonke umlimi abelayo njalo ayibhadalele ngendlela eqondileyo,” kubika uNkszn Ndlovu.
Uqhubekele phambili eveza ukuba nxa uthatha umshuwalensi kumele uzwisise ungakangeni kiyo.
“Nxa uthatha umshuwalensi kuqakathekile ukuba ubuze konke ongakuzwisisiyo njalo uyethatha isikhathi sakho ucabangisise ngayo ube sukhetha oqondileyo ohambelana lendlela osebenza ngayo.
“Esikhathini esinengi sithi nxa sibhoda emakhaya sithole imbiko yokuthi ama-solar panels athethwe ngumoya abantu abasalimi ikanti ingozi ezinjalo nxa bele-insurance akuhluphi, yikuhamba kuphela uyencediswa kuthengwe ama-solar ukulima kuqhubekele phambili kungelahlupho.
“Balimi asizameni ukuthi sibe lemshuwalensi ukuze singehlelwa zingozi ekulimeni kwethu senelise ukuqhubeka ngomsebenzi wethu wokulima,” kuphetha uNkszn Ndlovu.
