Online Reporter
Silo Mehleli Dube
UBABAMKHULU wami wayethi nxa esilaya singamajaha hatshi azalwa zintombi kodwa ngamadodana akhe wayethi umhlaba liwunyathele liwesabe, liwuhloniphe ngoba ngelinye ilanga uzakuba yisigogo kumbe ingubhamazwi elizoyiyembatha selibiziwe elizweni lemithunzana.
Wayesilaya ukuthi singabi ngamaqhalaqhala ahlakaniphele eceleni. Amazwi akhe la, ngiwakhumbule ngibona esinye isehlakalo esenzakale esigabeni engihlala duze kwaso. Kufike indoda engaba leminyaka engamatshumi amane lanhlanu ekhuluma ulimi lweMpumalanga yavula ibandla layo.
Ibandla leli lathatha isigaba sonke ngodumo laba yindaba esegudwini kuthiwa iyabona ngumphurofethi omkhulu.
Angazi lokuthi abantu basebezwe ngobani, ngahamba ngisiyabona inkonzo yakhona engenwa sekunqunda amehlo ize iyephela empondo zankomo amaqhude esekhala okokucina.
Isimanga yikuthi wayegqoke izembatho ezimhlophe lezimnyama ekhanda efake indlukula ezandleni egqizile amangqonqo aluhlaza, amhlophe alithanga kwasekungani ngumchilo wamakhosikazi wona ovame ukuba khona kusanda kuna izulu. Nxa etshumayela lenkisela yomuntu kwakungela Bhayibhili incwadi engcwele, ekaMvelinqangi, wayephethe epepetsha ethi umoya uthi. Lokuvunula kwakhe kwakufanana xathu lezinye iwosana, wayebhadalisa ombuzi labonkomo ayethi bafuna ukwelatshwa izifo ezitshiyeneyo, ukwenza kwalindoda kwangikhumbuza omunye umyalezo wemilayo elitshumi engayifundiswa ngumbalisi wami weSunday School ukuthi ungabi labanye onkulunkulu ngaphandle kwakhe ngoba ngazibuza kanengi ukuthi sonto bani okungabalwa khona iBhayibhili.
Ngahle ngayifunda ivaliwe ukuthi ngamandlwane nje, umuntu sethole isu lokukhanda imali lokuphuca abantu imfuyo yabo umuntu ezembese esemvu yena engumgulukudu weganyane.
Banengi abangasawuhloniphiyo umhlaba asebenqineka ngokuhamba bevula amasonto beqila abantu, bakhohlwe ukuthi akukho owaphikisana leBhayibhili walungelwa, labafundisi bangangifakazela.
Ayixabene
