admin
YiNtatheli kaMthunywa
UFISO Siziba, olilunga leqembu leHighlanders usebike ukuba ufuna ukuba ngumsekeli kamgcinisihlalo waleliqembu.
USiziba, oseleminyaka esekela iBosso, uphumele egcekeni ngeviki ephelileyo, ebikela uMthunywa ukuthi usecabange ukuba abeyingxenye yenkokheli zeqembu.
Uthe ufuqwe yizikhalazo zabalandeli lamalunga aleliqembu ukuthi angene kumbango wesikhundla lesi.
“Kulandela ukucetshiswa ngabantu abanengi, besithi kufanele ngibe ngumsekeli kamgcinisihlalo, ngibone kukuhle ukuthi ngiphatheke.
Ngithunywe ngabalandeli lamalunga,” kutsho uSiziba.
Uthe okumqoka kuye yikuthi abeyingxenye yenkokheli zethimu yezwe lonke, ukuze ancedise ekufezeni imbono elakho ukukhulisa iqembu.
Ugcizelele ukuba ukumanyana kwenkokheli, abasekeli lamalunga eqembu yikho okuzaphakamisa inhlelo zethimu le.
“Kumele sibambane, senelise ukuqhuba inhlelo zeqembu siyimuli inye.
Ukuxabana akusizi lutho.
IHighlanders ngeyethu sonke.
“Ngizasebenza labo bonke abakhona.
Okuqakathekileyo yikusebenzelana ndawonye, sibone ukuba iqembu lethu liyaphambili.”
Kubalandeli bomdlalo webhola, uSiziba waziwa njengendoda elesiphiwo sokuba yinkokheli njalo elothando lokuthuthukisa ithalenta labadlali abasakhulayo.
Uyinkokheli yeZifa kumhlubulo ongezansi yelizwe lapho abambe khona isihlalo semincintiswano.
Ukhetho lukamsekeli kamgcinisihlalo luzaqhutshwa ngempelaviki yakuqala ngoNhlolanja.
USiziba kukhangelelwe ukuthi alwisane loBabongile Sikhonjwa kukhetho lolu.
Online Reporter