admin
Emmanuel Ndlovu
UMKHOSI wokubukisa ezemidlalo elizweni owe-Inxusa Theatre Festival usudumela emansumpeni nanko phela ukhangelelwe ukuvungama ekupheleni kwayonale inyanga.
Umkhosi lo ozaqhutshwa enkundleni ye-Amakhosi Cultural Centre ukhangelelwe ukuqala mhlaka 25 Mbimbitho kusiya ku-29 ngaphansi kwendikimba ethi: Merging cultures.
UThembi Ngwabi ongomunye wabaqoqi balumkhosi uthe inhloso yalumkhosi yikuthuthukisa ezemidlalo koNtuthu ngoba abantu bakhona abaselamfutho lolukuluku lokuzithanda.
“Abadlali abapheka ezemidlalo koBulawayo basebenza gadalala impela kodwa umphakathi ozimiseleyo ukuphakama aze kunkundla zokubukiswa kwemidlalo le kakho.
“Inhloso ye-Inxusa Theatre Festival yikuvuselela ulukuluku lokuthi abantu bathande ukuzichithela isikhathi sabo bebukele ezemidlalo,” kutsho uNgwabi.
Ubuye wathi enye inhloso yomkhosi lo yikuvulela inkundla kubadlali abasasungulayo ikakhulu labo abavela kumakolitshi emfundo yaphezulu.
“Sebebanengi abasakhulayo abavela emayunivesithi njalo abayabe beqeqetshe kuzifundo zemidlalo kodwa bathi beqeda baswele lapho abangenza khona abakufundileyo. “Umkhosi lo ujonge ukubanika ithuba lokuthi babukise ubuciko babo kwezokudlala. Lokhu kuzanceda ukuthuthukisa uhlonzi lwemidlalo ezaphekwa koNtuthu,,” kugcizelela uNgwabi.
Online Reporter