admin
Emmanuel Ndlovu
UMKHANKASO weqembu le-Iyasa owokudinga abadlali abaleziphiwo kwezemidlalo owaqala kuminyaka emihlanu edluleyo koBulawayo, usuze wenelisa ukufinyelela lasezikolo zemaphandleni.
Kusukela ngomnyaka ka2009 umkhankaso we-Isiphiwo Sami Talent Search obuqhutshwa liqembu le-Iyasa ubulokhe ugxile kulelidolobho.
Ngalokhu ubusuwenelise ukuhuga phose izikolo ezingu-30 ebezithi zingaqeda ukufundiswa ngezemidlalo ngamalunga eqembu, zicine ngokungqikilana kumncintiswano yezemidlalo.
UNkululeko Innocent Dube ongumqondisi weqembu leli uthe lonyaka babone kungcono ukuthi baguqule izenzo ngokuphendla ezikolo ezisemaphandleni.
“Lonyaka umkhankaso wethu siyawuqhelisa ezikolo ezisemaphandleni ngoba sinanzelele ukuthi kulezi izindawo kulabafundi abaleziphiwo kwezokudlala kodwa kusuke kubenzima ukuthi bazitshengise umphakathi ngoba engekho amathuba okwenza lokhu.
“Lesi isikhexe esikhona phakathi kwabontanga abasemaphandleni lasemadolobheni kwezokudlala sifuna ukusivala lonyaka yikho sihambise umkhankaso wethu emaphandleni,” kutsho uDube.
Ubuye wathi bazaqala baphendle izikolo ezimbalwa ezisesabelweni seMatabeleland North andubana baye kwezinye izabelo ngomnyaka ozayo.
Kukanti indikimba yalonyaka kubikwa ithi, Who am I?
Kulumkhankaso amalunga eqembu le-Iyasa ayabhudula ezikolo ezikhethiweyo ngokuhamba efundisa abantwana ngemicimbi egoqela ukuhlabela, ukugida imigido yomdabu, eyakulezi insuku, ukuhaya inkondlo kanye lokudlala belingisa.
Iqembu leli lenza lokhu ngoba lilegunya kwezokudlala njengoba lingelinye lamaqembu alodumo elizweni.
Online Reporter