Online Reporter
Abel Ndooka
CHIKWATA chenyika chenhabvu chemadzimai chemaMighty Warriors chiri kupinda muhondo nemusi weChina svondo rino apo chichasangana necheAngola mumutambo wekurwira kuenda ku2026 CAF Women’s Africa Cup of Nations (WAFCON).
Mutambo uyu uri kutambirwa kuAngola uye wechipiri uchatambirwa kuSouth Africa svondo rinotevera sezvo parizvino muZimbabwe hamuna nhandare iri padanho rinotenderwa neCAF neFIFA kuti mitambo mikuru igotambirwa.
Makwishu e2026 WAFCON achatambirwa kuMorocco.
MaMighty Warriors akasimuka nemusi weMuvhuro akananga kuAngola uko ari kufanirwa kunohwina mutambo wavo nechikwata chenyika iyi kuti agokwanisa kufambira mberi.
Kana MaMighty Warriors akakunda Angola mumitambo miviri iyi yakatevedzana, anozosangana nechikwata chichahwina pakati peMalawi neCongo murwendo rwekurwira kuenda kuMorocco.
Achitaura neKwayedza, murairidzi wemaMighty Warriors – Sithethelelwe ‘Kwinji 15’ Sibanda – anoti gadziriro dzechikwata chake dzange dziri kufamba zvakanaka uye vachanosunga dzisimbe apo vachasangana neAngola nechinangwa chekuti vagofambira mberi mumutambo uyu.
“Tiri kushanda nesimba, chinangwa chedu chiri chekuti tibudirire kuenda kuMorocco kuWAFCON naizvozvo ticharwa semvumba kuti tigohwina mutambo wedu neAngola,” anodaro Sibanda.
