Online Reporter
Innocent Kurira
IKHEFU lemidlalo yeCastle Lager Premiership lizanika umqeqetshi weHighlanders isikhathi sokuthi ake atshaywe ngumoya, acabangisise indlela iqembu lakhe elidlala ngayo, nanko abalandeli abasuthiseki.
Uthe uyamukela ukuphumula kancane ngoba kuzamsiza ukuthi alungisise okuxegayo eqenjini.
“Ikhefu likunika amalanga amalutshwana ukuthi usebenze endaweni ezidinga ukulungiswa,” kutsho uKaindu. “Kuphinde kunikeze isikhathi esengeziweyo sokuqoqa ngokomzimba langokwengqondo.”
IBosso ingena kukhefu liphethe imiklomelo elitshumi lasitshiya galolunye kumidlalo elitshumi lane. Ukudlala kwayo akuthabisi abalandeli. Isiyehluleke ukunqoba kumidlalo emithathu ilandelana, itshaywa yiZPC Kariba 2-1, yadliwa 1-0 yiHerentals, yabangutshiki lobhanqa 0-0 leDynamos.
UKaindu ukholelwa ukuthi ikhefu lizakwenza kubelula kuye labadlali ukuthi baqondise lapho okonakale khona. Uthe uphezulu kokuhlola abadlali abafuna ukuthi bangene eqenjini. “Njengoba sikhangelele ukuthi kuvulwe ifasitela lokuthengwa kwabadlali ngoNtulikazi, sesibone abadlali abambalwa esifuna babeyingxenye yethu,” kutsho umqeqetshi lo.
