Online Reporter
Bhekimpilo Tshalibe
KULENINA elileminyaka engu-42 yokuzalwa lesiqintini seMagedleni, eGwanda elimiswe emthethwandaba ngokutholakala lilamambodlela angu-599 eNgoma.
UDebra Nyathi ubotshwe endleleni evela kweleSouth Africa emgwaqweni wakoBulawayo esiya eBeitbridge elezidakamizwa lezi.
UNyathi umiswe emthethwandaba weGwanda lapho umantshi anqume ukuthi ayesebenza amahola angu-210 emthethwandaba weGwanda.
Kubikwa mhlaka 21 Nhlolanja uNyathi wabanjwa ngabe-Anti-Smuggling Taskforce elamambodlela angu-599 e-Bronclear eyaziwa kakhulu ngokuthi yingoma ephakathi kwamasaka amabili.
Izidakamizwa lezi zahanjiswa esibhedlela seGwanda ukuthi ziyekhangelwa zingcitshi.
Umatshi ubenqume ukuthi uNyathi ayepika inyanga ezingu-12 kodwa wesula eziyisithupha kulezi eziyisithupha eziseleyo wathi ayesebenzela umphakathi kungelambadalo amahola angu-210 eMagadleni Primary School.
UNyathi ugwetshelwe ukuthi ayepika inyanga ezingu-12 ejele njalo wasekhitshelwa ezingu-6 esimeni sokuthi ayekwenza i community service okwamahola angu 210 eMagadleni Primary School.
Kusenjalo uNkosilathi Cakane oleminyaka engu-28 weTsholotsho ugwetshelwe ukuyapika inyanga ezingu-20 ejele ngemva kokutholakala elecala lokugqekeza.
Kubikwa mhlaka 16 Nhlolanja uCakane wagqekeza emzini kaWisdom Dumane wesiqintini seFusini eTsholotsho watshontsha umakhalekhukhwini wohlobo lweHonor kanye lemali engange iR900 umamangala elele. Kuzwakale ukuthi umakhalekhukhwini watholakala kuSindiso Mpala owaveza ukuthi wayewuphiwe nguCakane.
I-National Prosecuting Authority of Zimbabwe ixwayise uzulu ngamacala okugqekeza lobusela.
“I-NPAZ ixwayisa uzulu ngamacala okugqekeza lobusela, umuntu angawabotshelwa. Ukugqekeza kwephula ilungelo lomuntu lokuphepha njalo kuphambanisa umphakathi. Sikhuthaza izakhamizi ukuthi zigcine kuhle impahla zazo,” kuphetha i-NPAZ.
