Online Reporter
Lovemore Dube
U-SENSEI Branco Manyathela owomdlalo we-karate uthe basasekhona njalo benza kuhle.
UManyathela usebenza labasakhulayo abafika amatshumi ayisithupha lantathu (63) eNdlovu Youth Centre, eTshabalala koBulawayo. Ubike ukuba uyajabula ukusebenza labasakhulayo ngoba kuncedisa ukuthi bengatshoni besemigwaqweni lokubasusa kuzilingo zokusebenzisa izidakamizwa.
UManyathela ubengomunye wabasemkhosini wedolobho lakoBulawayo okhuluma ngomnotho okwezemidlalo, olwe-Sports Economy Indaba, oluqhutshwe ngoLwesithathu. IBulawayo Sports Economy Indaba izama ukuvula umphakathi amehlo ngokubaluleka kwezemidlalo.
“Siyaqhuba sibili siseTshabalala, silamalunga angu-63 abasakhulayo. Sicele ukuthi bakhululwe yizikolo zabo ngemva kwemini enkulu ukuthi labo bazotshengisela ubugabazi lobutshantshu babo,” kutsho uManyathela.
UManyathela ukhokhela iShukokai Karate Academy ethatha abantwana abaleminyaka emine kusiya ebadaleni.
Uthe uzakuya eHarare labantwana ebedlula itshumi abazayancintisana labanye khonale. Ngokutsho kwakhe, i-karate iyaphathisa ukuthi umuntu aziphathe kuhle.
Umbuthano weSports Indaba koBulawayo, uhlanganise abantu abanengi abavela kungatsha zempilo lezemidlalo abatshiyeneyo. Kubekwe imibono etshiyeneyo yokuphathisa ukuthi idolobho lithuthukiswe kwezemidlalo.
Ukuqhutshwa kwemidlalo ehlanganisa abantu abavela kwezinye indawo kubonakele kuphathisa kakhulu umkhonomi wedolobho lakoBulawayo. Umkhonomi uphakama ngokungena kwemali okudalwa yikusetshenziwa kwamahotela, ukudla lokugada imitshova bethekelela indawo zedolobho ezithile.
Okhangele ngokuthuthukisa kwamabhizimusi ekugatsha lwe-Economic Development uKhohlwani Moyo uthe sebekhangelele ukuthi abamabhizimusi labo bangenele ukuze ezemidlalo zithuthuke.
Uthe bakhangelele ukuthi baphathise njalo ekulungiseni inkundla zokudlalela.
