admin
Johas Moyo
KUSIGA esihlasimulisa umzimba okukholelwa ukuthi kulomoya wobuthakathi kulesalukazi se-Old Phumula esibanjwe xhaka sisenza ingcekeza emnyango kamakhelwane waso ngemva kokuxabana.
UViolet Dube ohlala ku-A 6367 ubanjwe esenza ihlazo leli phambi komnyango kamakhelwane wakhe, abaloja endlini eyodwa uJohn Sibanda kuviki ephelileyo emadabukakusa.
Kubikwa uDube ebona uSibanda wathi lothu wabaleka eqonda endlini yakhe etshiya ingcekeza le samuntu ongonanga okwenza indaba le yayafika emapholiseni.
UMthunywa uzwe ukuthi uDube esenze lokhu wavuka ekuseni waqonda enkambeni yamapholisa wathi umakhelwane uthi ungumthakathi okwacina kubangela ukuthi uSibanda laye etheswe icala.
UMthunywa ufike kule indawo wafica lengcekeza leyo ingakakhitshwa kodwa isithelwe umlotha.
UMthunywa ukhulumisane labanye omakhelwane abaloja kule indlu kodwa abangathandanga ukuqanjwa ngamabizo abafakaze ukuthi kungenzeka ukuthi uDube wakwenza.
“UDube loSibanda yingwe lenja njalo asingeke sazi ukuthi kuliqiniso ukuthi uDube nguye okwenzileyo kumbe hatshi kodwa esikwaziyo yikuthi ekuseni kuvuke kulengcekeza phambi kwendlu kaSibanda,” kutsho lumakhelwane.
UMthunywa uphinde waxhumana loDube olandule wemba phansi ukuthi ukwenzile lokhu.
“Uyangihlolela lubaba yikuthi nje uyangizonda yikho eseze watshela abantu ukuthi mina ngenzele ingcekeza emnyango wakhe, ngibona angani uluhlupho ngoba besihlezi kuhle lapha engakafiki.
“Khathesi mina sengingumuntu omubi phambi kwabomakhelwane labangane bami yikho nje ngahamba ngayambophisa ukuthi ungibiza ngelomthakathi. Wangithola ngizihlalele kuhle sefuna ngilandelele imithetho yakhe, mina kangeke aze akubone lokho, angisuye mthakathi mina,” kutsho uNksn Dube.
UMthunywa uxhumane njalo loSibanda oveze ukuthi kaphosisi ngoba ekwazi akhuluma ngakho njalo wazibonela ngawakhe amehlo.
“Ngambamba xhaka umsolwa equthile lapha njalo ngesaba ukuthi ngimbambe ngezandla zami ngoba ngisesaba ukuthi uzahlaba umkhosi kukhanye ngani besengifuna ukumdlwengula.
“Engakwenzayo yikubikela unkosikazi wami ngavuka ngitshela omakhelwane ngalesisiga. Sihlezi umama lo sixabana ngoba sengaphiwa isikhundla sakhe sokukhangela indlu kanye labaloja lapha endlini.
“Ukuxabana kwethu kuqale ngemva kokuthi abanikazi bendlu bethe ngikhangele indlu ngoba yena nguye owayekwenza lokho kodwa wasesidla imali,” kuphetha uMnu Sibanda.
Online Reporter