admin
UKUCHITHA igazi abantu sebekwenza into elula, sebekufanisa lokubulala inkukhu. Kanti umphefumulo womuntu yinto encane yini angithi nje iBhayibhili elingcwele liyakufakaza kumithetho elitshumi ukuthi ukubulala kuyisono.
Amaphephandaba kulezinsuku abhala njalonje ngendaba ezihlasimulisa umzimba. Kubikwa ngendaba zokubulalana ngezizatho ezingazwisisekiyo.
Okusuka kujinge uzulu aswele lempendulo yikuba abanye ababulalayo basuka babulale lezithandwa zabo, kambe umuntu omthandayo umbulala njani?
Ukusa kwamalanga elokitshini leCowdray Park sizwa ngokuhlahlelwa kwabantu ngamahloka kukanti kwezinye indawo zelizwe kuzwakala njalo ukuthi abantu bayahlaselwa yizigebenga ezihlomileyo babulawe.
Kunga ngumoya bani osusenza abantu bangabi lomzwangedwa ekubulaleni? Nxa kuyimali edingakalayo, iyavela ngaphi lawe mabulala ungelayo?
Amapholisa kawaqinise umthetho ikakhulu emngceleni welizwe ngoba zinengi izikhali ezingena kuleli. Nxa kuyikuthi kulalapho eziphuma khona akuchwayisiswe kubotshwe amabhawudo kwazakale ukuthi ziphuma njani njalo labobani.
Ilizwe lethu belingelinye lamazwe alokuthula ngoba lenelisa ukuqoqa izikhali ngesikhathi kuvelwa empini. Pho lezi izikhali esezivumbuluka zivelela ngaphi?
Akuthathwe amanyathelo ngoba okwenzakala emazweni angentshonalanga asikufuni, singabantu abafuna ukuhlala ngoxolo langokuthula. Sicela njalo ukuthi lenkambeni zalabo ababona ngomthetho lokuthula elizweni kuqiniswe umthetho ngoba kungenzakala ukuba izikhali lezo zisuka khona.
Asixekaneni lokuchitha umphefumulo mahlayana. Nxa engumkakho esekwehlule kungcono umbisele kwabo njengokumthatha kwakho.
Umphakathi nxa ungasebenzelana lamapholisa izigilamkhuba lezi zilakho ukuthi zibotshwe ngokuphangisa.
Uzulu kasebenzelane ndawonye lamapholisa kubanjwe izigangi zonke ngoba phela zihlala phakathi kwethu.
Khathesi koBulawayo yisiphithiphithi ezitaladeni ngoba kulezethekeli ezivela endaweni ezitshiyeneyo ezize kumbukiso weZimbabwe International Trade Fair. Kungumbono woMthunywa ukuthi kube lokuthula njalo nxa kukhona okusolayo uncwebe amapholisa indlebe ukuze abophe zonke izigangi.
Kungumlandu womphakathi ukuthi ungakufihli izigangi ngoba kusasa kuzehlela bona.
Udlame alwakhi isizwe kodwa lubisela emuva intuthuko.
Amapholisa ezigaba kawavuselelwe ngoba ayaphathisa lawo ekulwisaneni lodlakela oluba khona lapho esihlala khona.
Nxa engaba khona alakho ukubona masinya izigangi njalo aphathise ekubotshweni kwazo.
Kungumbono waleliphephandaba ukuthi nga uzulu usebenzelana lamapholisa ukuze kuqedwe ububi emphakathi.
Online Reporter