Online Reporter
Innocent Kurira
ABALANDELI beHighlanders babika ukuba nxa ingaqhatsha uBekithemba Ndlovu, ibhentshi labaqeqetshi lizaqina nko.
Abasiki bebunda abaseduzane lokwenzakala eqenjini baveza ukuthi uNdlovu uzaphiwa isikhundla sokuba ngumsekeli kamqeqetshi wesibili. Okwamanje umqeqetshi omkhulu uBenjani Mwaruwari uncediswa nguMkhokheli Dube.
NgoLwesithathu uNdlovu ubonakale emahofisini eHighlanders, okuyikhona okuqinise amahemuhemu la, owokuthi uzaphiwa umsebenzi. Wake wayidlalela, wayiqeqetsha iHighlanders, ngakho akusoke kumangalise ukuqhatshwa kwakhe.
Ngesikhathi ebonakala emahofisini aku-50 Robert Mugabe Way, iBosso ibilungiselela ukuya eBotswana lapho ezalolonga okweviki. Uhambo lweBotswana luyingxenye yokulungiselela isizini yeCastle Lager Premiership ozaqala ngoMbimbitho.
Loba iziphathamandla zeqembu zikhethe ukuthula mayelana ngodaba lukaNdlovu, abalandeli baqina ngokuthi umqeqetshi kumele aphiwe umsebenzi.
UNduduzo “Teekay” Ncube owaziwa kabanzi ngokusekela iBosso uthe: “UBeke uyafuneka eqenjini. Ungakhangela ukuthi ibhentshi labaqeqetshi limi njani okwakhathesi, kudingeka umuntu ongafundisa abafana ukuvimba ibhola. UBeke simazi njengengcitshi endaweni yokuvimba ibhola enkundleni. Wayekwenza lula lokhu esadlala.”
USibahle Tshili oweNkayi utshele iphephandaba likazulu ukuthi kaboni cala ngokuqhatshwa kukaNdlovu.
“Ngumfana wethu lo. Kabuye ezosebenzela ekhaya, ayekele ukudlalisa isikhathi lamanye amaqembu.”
UThabiso Gundu kazange akufihle ukuthi kuyamjabulisa ukuzwa ngokuphenduka kukaNdlovu.
“Ya, kwaze kwamnandi ukuba ngumlandeli weHighlanders lonyaka. Sizakholisa ngoba silabaqeqetshi abazi ukwenza umsebenzi. Kangene uBeke.”
