Online Reporter
Kwathi ngezikhathi kutholakala amaphilisi okulalisa inhlungu zomkhuhlane wengculazi, kwajabula wonke umuntu ngoba kwaphose kwatshabalala isitshaba sonke kumagumbi wonke womane omhlaba, ikakhulu emazweni ase-Africa. Umkhuhlane lo waze waphiwa ibizo lokuthi ngumbhuqazwe ngoba uthanyela sibili.
Zilutshwane imuli ezingazange zithathelwe izihlobo yilomkhuhlane, ngivumele ngithi phose akula, ikakhulu emazweni e-Africa, phela umuntu wayephenduka abengokunye, acake ufice eselingana lomhlwazi, inwele ziphephuke zifanane loboya bukamangoye ahude umuntu wakhona aze atshone enqunu ngoba engasela mpahla zokutshintsha. Izikhwicamfundo kwezempilakahle zazezavumbulula iphilisi elenza umuntu aphile legcikwane njengaye wonke umuntu ingqobo elandela akutshelwa ngodokotela, yikho lapho okwaqala ukuphunguka kwenani lokufa kwabantu.
Banengi abantu engibaziyo lawe obaziyo njalo abaphila ngokunatha lawa amaphilisi, ofica beyiziqwabalanda becwebezela bezimuke okomntwana wenduna esidla imali yamacala. Isimanga, bakhona abathi bangazibona sebebuyele esimeni sabo ngezizatho ezaziwa yibo bayekele ukunatha, kwesinye isikhathi besekelangamabomu njalo kwesinye isikhathi beyengwa ngabaphrofethi.
Ukhona umngane esimbeke ngeviki ephelileyo, uthe esezibone esephile iminyaka eyisikhombisa ekuhlelo lolu kwafika okungabaphrofethi kwathi kwelapha izifo zonke ngokupha umuntu imithandazo engamanzi, efakwe embodleleni. Nxa umuntu angawanatha lawo manzi asembodleleni ebizwa ngokuthi ngumadubula uvele aqine nko labathakathi bawela khatshana le ngemva kwezinkalo zezintaba nxabethe bazama ukukuthinta, laye walingeka wekela.
Abezempilakahle bazama ukumqonqosela ngokuqakatheka kokulandela loluhlelo lokunatha amaphilisi mihlangemihla kodwa wanganaki. Akuphelanga nsuku zatshwala waqala ukugula, sadideka sonke ngoba wawungeke wazi ukuthi ubulawayini, ngoba wayethi kubuhlungu umzimba wonke njalo engasayingaphandle, wayethi angabuzwa loba yiphi ingxenye yomzimba athi ibuhlungu, waphenduka usane lona oluthi nxa lubuzwa luvume yonke into. Sathi simhambisa esibhedlela omongikazi bathi sebebone ukuthi ngumuntu okade eseyekele ukunatha amaphilisi.
Wawubona nxa bemsiza bemvivinya ukuthi intshukuntshu yokuthi bamncede aphile abaselayo ngaze ngabezwa abanye benyeya emkotweni wewadi besithi njengalowo obengasanathi amaphilisi, kutsho ukuthi ubevele esefuna ukufa, ngeke satshona sizihlupha, lakanye baphuma baziyela natha uhololo wabo noma izikhathi zokudla okwekuseni zazingakatshayi, wasala egomela waze wayakobhekabezayo.
Isixwayiso sami sithi bandla nxa uphila ngamaphilisi noma angaba ngowomkhuhlane mhlobobani landela khonokho okutshiwo ngodokotela ikakhulu awomkhuhlane wengculazi ngoba awukatholakali umuthi wakhona, singayengwa ngeziwiji njengomntwana osacathula.
Ayixabene!
