Online Reporter
Ethel Ncube
KULENDODA yePlumtree ebhaxabule umakhwapheni kayise ngemvubu ngenxa yesikhwele sikanina.
Umsolwa, uLawrence Moyo, oleminyaka engu-20 yokuzalwa umiswe emthethwandaba wePlumtree ngoMvulo kuyonale iviki esetheswa icala lokubhaxabula umakhwapheni kayise.
Umtshutshisi, uSelestine Madziwa ubikele inkundla ukuthi mhlaka 27 Nkwenkwezi uMoyo watshaya uSitshengisi Nkomo emsola ngokuthi uthandana loyise.
“Mhlaka 27 Nkwenkwezi kuwonalo umnyaka ntambama, uSitshengisi Nkomo wayesiya ngekhaya eqeda kuvala esitolo.
“Esendleleni wahlangana loLawrence ethwele imvubu, wambhaxabula ngayo ngapha ephethe emsola ngesenzo sakhe sokuthandana loyise ethi nguye obenza badubeke ngoba uyise engasabanakekeli langemali yesondlo.”
Umamangala lokhu akuzange kumphathe, wasuka wayabikela amapholisa okwadala ukuba umsolwa abotshwe.
Umantshi uJoshua Nembaware ngemva kokulalela icala leli uqume ukuthi uMoyo azapika inyanga ezingu-18 ejele kodwa wabuye wazesula zonke, kukhangelelwe ukuthi asebenzele umphakathi kungelambadalo, amahola angu-210.
