Online Reporter
Fairness Moyana
AMANKAMPANI ezimbamgodi, lamabhizimusi akulolugatsha sebekhuthazwe ukuthi basebenzise imitshina yakulezinsuku ukuze benqabele ukufaka impilo zabantu engozini lokungcolisa umkhathi.
Isimemezelo lesi sibekwe yinduna uWhange kumbuthano wokukhumbula izisebenzi zeHwange Colliery ezingu-427 ezafela emgodini ngo1972.
Ngenxa yokwanda kwamankampani aphatheka kumisebenzi etshiyeneyo kwezokwemba lamandla kagetsi, idolobho leHwange selilomoya ongcolileyo kwezinye indawo, okudale ukukhonona kuzakhamizi ngoba zisesabela ukubanjwa yimikhuhlane.
“Ngiyazi ukuthi ukukhathazeka ngokwembiwa kwamalahle kugxile kakhulu ekungcolisweni komkhathi. Kodwa, ngitshelwe ngabaphathi be-HCCL Holdings ngomsebenzi abawenzayo wokugqugquzela ukusetshenziswa kwemitshina yakulezinsuku, ehlanzekileyo,” kutsho induna uWhange.
Uncome indlela iHwange Colliery esiphakamise ngayo inhlelo zokuphepha kwezisebenzi, kusukela ngesehlakalo seKamandama.
“Kunengi osekwenzakele kwezokuphepha kubhizimusi lokhe kwaba lengozi yeKamandama, kodwa akutsho ukuthi kumele sihlale nje, singanaki inhlelo zethu zokuphepha njengesigaba.”
Induna itshayele ihlombe inkampani le ngokugebha izibholane lokuncedisa umphakathi ekutholeni usizo lwezempilakahle.
Umaqhuzu weHwange Colliery uWilliam Gambiza uthe bazaqhubekela phambili ngokuqinisekisa ukuphepha kwezisebenzi.
Kumbuthano lo bekulabafelokazi abatshiywa ngomkabo kungozi yeKamandama.
