admin
Yintatheli kaMthunywa
KUBE yisisanasana ubukhwa bezinja lapho omunye umfana ebhuqe khona isalukazi esingugogo wakhe kwaba luthuli kubangwa i-memory card elokitshini leCowdray park koBulawayo ngeviki ephelileyo.
UWillard Nyoni (18) kubikwa ubhuqe ugogo wakhe uMayela (95) kwaze kwahela kozeleyo, kudaba olususwe yikucatsha kwe-memory card lapho abahlala khona.
Omunye wezakhamizi zakule indawo uMnumzana Bhekinkosi Tshuma uveze ukuthi uWillard watshaya ugogo wakhe ngemva kokucatsha kwe-memory card eyayingekadadewabo kungakho-ke abangakibo babecabangela ukuthi nguye oyithetheyo.
“UWillard wazondela ukuthi kwafunyanwa ukuba i-memory card kadadewabo uSamantha yayingabonakali njalo abangakibo babecabangela ukuthi nguye oyithetheyo. Kukhanya uWillard wayesele yedwa endlini okuyikho okwadala ukuthi kucatshangelwe ukuba nguye oyithetheyo.
“Ngemva kwalokho wasuka wayanatha utshwala wabuya esedakiwe wafika waqala ukuthonisisa wonke owayesendlini ngokuthi kungani besithi utshontshe imemory card. Kuthiwa wakhangela isalukazi esingugogo wakhe wasithonisisa ethi kungani sikusekela lokhu wamane weqela isalukazi wasibhuqa kabuhlungu.
“Mina ngezwa sokungumsindo komakhelwane ngagijimela khona ngisiyaphosda ilihlo ngathola sebelamule abanye omakhelwane kodwa indaba iqala ngangilalele njengomakhelwane,” kutsho uMnu Tshuma.
UMthunywa uxhumane lomnumzana Rodin Mnkandla onguye ogcine uWillard wachaza ukuthi ubuhlungu ngokwenziwa nguWillard kunina noma nje engumzukulu wakhe.
“UWillard wabuya edakiwe ntambama wafika ethethisa abantu ngakibo ngemva kwalokho wafuqa umabonakude ethi ufuna ukumbulala. Uthe esenza njalo ugogo uMayela wazama ukubamba umabonakude emkhuza ukuba engambulali wasemfuqela phezulu kwakhe kabuhlungu ugogo walimala.
“Ngibuhlungu ngento eyenziwa nguWillard kumama ngoba umama usekhulile okokuthi akufanelanga ukuthi atshaywe. Noma nje indaba le sayisa emapholiseni awazange amvalela athi ayamkhuza kuphela,” kutsho uMnu Mnkandla.
derick.khumalo
Online Reporter