UBilliat ulethemba

Nkosilathi Sibanda

UKHAMA Billiat ubika ukuba akalavalo njalo usekhuthaze amaWarriors ukuthi ahlale ehlose ukunqoba kumdlalo wabo leSouth Africa owe-2026 Fifa World Cup Qualifier kuGroup C.

Umdlalo ukhona lamuhla eMoses Mabhida Stadium, eThekwini, eSouth Africa ngehola lesithupha ntambama.

Ekhuluma lentatheli eseDurban, uBilliat uthe:
“Iqembu liqhuba kuhle kakhulu. Sidinga ukuthi sinqobe, singabi lovalo. Ukwethembana kubalulekile phakathi kwethu. Kudingeka ukuthi silandele lokho umqeqetshi asilaya khona.”

Uthe bayazwana njengabadlali.
“Siyezwana, silobudlelwano obuhle. Okuqakathekileyo yikuthi sidlale ndawonye, ngomoya munye.”