Online Reporter
Langalakhe Mabena
U-DJ odume umhlaba wonke oweSouth Africa, uBlack Coffee, usebonise ukubonga kwakhe ku-Oskido ngokumhambisa kukhefu endaweni ezidulayo emazweni ase-Europe, njengendlela yokumncoma ngokumsekela ekuqaleni komsebenzi wakhe.
Laba bobabili basanda kuvakatshela endaweni ezidumileyo emhlabeni ezibalisa i-Ibiza, eSpain leMykonos eGreece, lapho u-Oskido aphinde wathola ithuba lokukhwela indizamtshina ecacayo, okwakuqala empilweni yakhe.
Ekhuluma ngaloluhambo, u-Oskido uthe lumkhumbuze ukuthi ukwenza okuhle kwabanye ungakhangelelanga umvuzo kuyabhadala ngokuhamba kwesikhathi.
“Eminyakeni engu-21 edluleyo sabona ithalenta kuBlack Coffee ngesikhathi abantu abanengi bengakamnaki. Lamuhla bonani lokho uNkulunkulu asemenzele khona.
“Kuliviki ungiphathe kuhle e-Ibiza wasesithi, ‘Bhudi, asihambe siye eMykonos eGreece.’ Ngithe ngisathi, ngazibona sengiphakathi kwendizamtshina yabacebileyo, okwakuqala empilweni yami.
“Impilo ilezindlela zayo ezinhle zokubuyisela okuhle. Yenzani okuhle ngenhliziyo yonke, lingabali ukuthi senzele bani. UNkulunkulu uyakwazi ukukwandisela ngendlela ongasoze uyicabange,” kutsho u-Oskido.
U-Oskido waba ngomunye wabantu bokuqala ukubona ithalenta likaBlack Coffee, wamnika ithuba lokungena emsebenzini yomculo ngesikhathi engaphansi kwenkampani yakhe, iKalawa Jazmee, ngomnyaka ka-2005.
Ngaphandle kokumkhuphela idlalade lakhe lokuqala, u-Oskido waphinda wameluleka njalo wamvulela amathuba amenza wakhula waze waba ngomunye wabo DJ abadume kakhulu emhlabeni.
