Online Reporter
Fungai Muderere
INGWAZI yenguqu kuleli, uMadinda “Khathazile” Ndlovu, usekhuthaze ukuthi ukukhethwa kwabadlali beqembu lesizwe, amaWarriors, kuye ngobungcitshi babadlali kunye lokusebenza nzima enkundleni.
Ekhuluma ku-podcast yeDiasbhora, owayengumdlali lomqeqetshi wamaWarriors uMadinda uthe iZimbabwe ilabadlali abanengi abalethalenta, kodwa impumelelo yeqembu lesizwe izakuba khona kuphela nxa abadlali bekhethwa ngenxa yokufanela kwabo, hatshi ngenxa yezinye izizatho.
“Ikusasa lihle nxa singenza okuqondileyo ngesikhathi kukhethwa abadlali,” kutsho uNdlovu.
UNdlovu uthe izinga elalisenza ibhola leZimbabwe lihlonitshwe selehlile, okwenza kube lula kwabanye ukudlalela iqembu lesizwe kodwa behluleke ukuzibonakalisa ngokusebenza nzima enkundleni.
“Khathesi sekulula ukudlalela iqembu lesizwe. Wonke umuntu uyakwazi okwenzakalayo. Akusimfihlo. Kudala ukubizwa ukuthi uyedlalela iqembu lesizwe kwakusenziwa ngenxa yethalenta kuphela,” kutsho uMadinda.
UNdlovu, owadlala ibhola lezinga laphezulu ngaphambi kokuba ngumqeqetshi, uthe ukuziphatha kuqakathekile ukuze ube yingcitshi.
“Ngikhumbula ngisesengumqeqetshi ngangitshela abadlali ukuthi nxa ungabanga khona ekulolongeni amalanga amabili, kufanele ukwazi ukuthi kawusafanelanga ukuthi ukhethwe ube ngomunye wabazadlala.”
Amazwi akhe aze ngesikhathi lapho impikiswano ngokukhethwa kwabadlali bamaWarriors iqhubeka isanda, abasekeli bomdlalo wenguqu bebuza ukuthi kusetshenziswa yiphi indlela ukukhetha abadlali beqembu lesizwe.
Owayengumdlali njalo engumqeqetshi weHighlanders, uCosmas “Tsano” Zulu, uthe:
“UMadinda ukhuluma iqiniso. Muva nje ngibukele umdlalo lapho amaWarriors ayedlala le-India. Umqeqetshi ubabona ngaphi abadlali abadlala eScotland loba e-United Kingdom? Ngubani omnika ulwazi? Ngabe ngabaqeqetshi yini? Khethani abadlali abasefomini enhle, hatshi ngenxa ye-agent loba isihlobo somdlali. Akumelanga kube lokungenela kwabanye ekukhethweni kwabadlali.”
UNdlovu uthe iZimbabwe ilabadlali abenelisa ukuthi bancintisane lamazwe amakhulu e-Africa, kodwa lokhu kuzakwenzekala kuphela nxa wonke umdlali ezwisisa ukuthi ukugqoka ijezi leqembu lesizwe lilungelo elitholwa ngokusebenza nzima.
