Online Reporter
INHLANGANISO yezempilakahle emhlabeni, i-World Health Organisation (WHO), isiveze ukuthi balinganiselwa ngaphezu kwe-billion emhlabeni jikelele abaphila lezifo lezimo okuyamene lokusebenza kwengqondo, inengi labo lilenselelo yokungatholi usizo lokwesekwa okufaneleyo.
Kungakho abesikhungo sezempilo esizimeleyo, i-Affinity Health, sebekhuthaze ukuthi kwande izingxoxo ezivulekileyo ngezimo ezithikameza umqondo, kube kubhekwa futhi lokuthi ukuthuthuka kobuchwephetshe besimanje kungasiza njani ukwenza kube ngcono isimo sezempilo lokusekela abagulayo.
“Ubuchwephetshe buyatshintsha futhi buyathuthuka nsuku zonke kanti ubuchwephetshe besimanje bungasiza ukusekela abantu abanengi lezimo zokuthikamezeka komqondo ukuthi bakwazi ukuthola usizo lokwenza ukuthi isimo sabo sibe ngcono. Lobo ubuchwephetshe kudingeka ukuthi kusebenzele ukusiza abafundele lumsebenzi, hhayi ukuvala isikhala somsebenzi wabo,” kutsho isikhulu esiphezulu se-Affinity Health, uMnumzana Murray Hewlett.
Umbuzo uthi ubuchwephetshe bungenza yini ukuthi abantu babhoboke?
Kujwayelekile ukuthi abantu abalezimo eziyamene lokuthikamezeka komqondo njenge-anxiety, i-depression, i-trauma le-burnout ukuthi bangaphangisi ukufuna usizo lokulungisa izimo ezinje. Abanye babo basuke besabe ukwahlulelwa, kuthi abanye bengaboni lokuthi izimpawu zalezizimo seziqala ukukhomba umonakalo.
Nokho akhona amathuluzi e-Artificial Intelligence (AI) ayakhiwa futhi alungiselwa ukuthi akwazi ukusiza ukuhlola izimo ezinje ebantwini, njengoba amanye awo ezasiza ukuhlolisisa indlela umuntu alala ngayo, izinga lokucindezeleka emqondweni lokunye okweyamene lalokho. Konke lokho kubhekwe ukuthi kusize ukukhuthaza ukuthi abantu baphangise babhoboke futhi bakhulume ngokukhululeka ngalezi zimo zokubahluphayo.
Nakuba ubuchwepheshe be-AI bungeke busize ukwelapha lezi zimo ngokwabo kodwa kubonakala kuzasiza abafundele lumsebenzi ukuthola lokuqapha lula izimpawu ezikhomba inkinga, okubhekwe ukuthi kulekelele ukuthi kungabi lomonakalo.
I-AI isiza abasebenzi bezempilo ukuhlela kahle imininingwane yesigulane ngendlela ezakwenza kube lula ukubheka okusiphetheyo. Iyenelisa njalo ukuhlela ama-appointment okubonana labezempilo kwesiguli lokusikhumbuza ukwenza lokho. Ingaqhamuka lamasu angasiza ukwehlisa ingcindezi emqondweni. Ilakho futhi ukusiza ukwandisa izinhlelo zosizo ezingadingi ukuthi isigulane siye emtholampilo ngqo.
“Okuhle kakhulu futhi yikuthi ubuchwephetshe bungasiza ukuthi uma kulezimo zokuba matasa ezikhungweni zempilo ngokwehlisa ingcindezi yomsebenzi wobubhalane ojwayele ukugqilaza odokotela, abeluleki bezengqondo labosonhlalakahle — okungabasiza yikuthi bakwazi ukubhekana lomsebenzi wabo ngokukhululeka,” kutsho uHewlett.
Ongoti bezempilo bakholwa ukuthi ubuchwephetshe be-AI buzaqhubeka lokukhula lokuthuthuka kuleminyaka ezayo kanti futhi kuvele lokuthi indlela obusebenza ngayo ingasiza ukuphucula izimo zokusebenza, kulekelela ukuphangisa kutholakale izimo ezinje ezihlukumeza abantu emqondweni — okungaba lomthelela omuhle kukhangelwe phambili.
Bagcizelele ukuthi yiloba i-AI izaba lusizo kepha futhi kusemqoka ukugcizelela ukuthi ubuchwephetshe abuzukuvala isidingo somsebenzi wezisebenzi zempilo.
