Mthokozisi Ncube
UMCULI wakuleli ohlala eSouth Africa, uBlack Diva, usekhiphe ingoma entsha yomdumo weDancehall ethi “Dlali Ngoma”, ayenze esebenzisana lompheki wezingoma weHarare uRay.
UBlack Diva, odabuka eShangani Mine, uthe usuke eSouth Africa waya eHarare ngenhloso yokuyalungisa ingoma le ngemva kokuthi uRay emthumele i-demo eyamthokozisayo.
Uthe ingoma le ikhuluma ngothando lomculo, amathalenta, amasiko lenkululeko yokuziveza ngendlela umuntu ayiyo, ekhuthaza abantu ukuthi bazamukele njalo bangazivaleli amathuba okutshengisa amathalenta abo.
UBlack Diva uthe ufuna njalo ukuthi ingoma le itshengise ukuthi umculo we-Africa uyenelisa ukuhlanganisa abantu kungakhathalekile ukuthi bavela kuliphi ilizwe. “Le yingoma ephakamisa umculo, ithalenta, amasiko lamandla okuziveza. Ikhuluma ngokuthakazelela umculo, ukwamukela ukuthi ungubani lokuzinika ithuba lokukhanya ngaphandle kwemingcele yamazwe.
“Ngaphandle kokuthokozisa abantu, ngifuna njalo ingoma le ibakhumbuze ukuthi umculo kawulamngcele lokuthi amathalenta ase-Africa kumele athakazelelwe kuwo wonke amazwe,” nguBlack Diva lo.
Uthe ukusebenza loRay kube linyathelo eliqakathekileyo kuhambo lwakhe kwezomculo ngoba kumnike ithuba lokusebenza endaweni entsha yokusungula imiculo, ngesikhathi efaka umdumo wakhe awujayele eSouth Africa.
“Ukusebenza loprojusa womculo eZimbabwe kunginike ithuba lokuzwa indlela ezehlukeneyo zokusungula umculo, ngisethula njalo umdumo wami waseSouth Africa. Ukusebenzisana lokhu kumayelana lokwakha ubudlelwano, ukuhlanganisa abantu lokuvula amathuba emazweni e-Africa.”
Lanxa uhambo lwakhe lokuya eHarare beluqondane lokusebenza loRay, uBlack Diva uthe ufuna njalo ukusebenzisa ithuba leli ukukhanyisa amathalenta eMatabeleland, ikakhulu koBulawayo.
Uthe isabelo seMatabeleland silabaculi abanengi abalamathalenta kodwa basadinga ukwaziwa lokuthola amathuba okuzwakala ngaphansi kwamanye amazwe.
“Angizami ukwethula uBlack Diva kuphela, kodwa ngifuna ukuthi abantu bavule amehlo babone ukuthi eMatabeleland lakoBulawayo kulamathalenta.”
UBlack Diva uthe indlela abantu abamukele ngayo ingoma yakhe eHarare iyamkhuthaza, njalo uthemba ukuthi lokhu kuzamnceda ukuthi akhe ubudlelwano labakhankaseli bomculo, abalandeli labanye abasebenza kwezomculo.
“Ngikholwa ukuthi ingoma yami le yisiqalo sento enkulu. Ngizimisele ukusebenza labanye abaculi, amaprojusa omculo eZimbabwe ngoba nxa abaculi base-Africa besebenza ndawonye, siyavulelana amathuba njalo sithuthukise umculo wethu,” kutsho uBlack Diva. UBlack Diva wazalelwa eShangani Mine, esibaneni seNsiza, esabelweni seMatabeleland South. Uthando lwakhe lomculo lwaqala esafunda, lapho ayecula khona kumaqembu esikolo.
Ngemva kwalokho waqalisa ukulandela umsebenzi womculo njengomculi ozimeleyo, esebenza ngenhlobo ezehlukeneyo zomculo ezigoqela iDancehall, iHip-Hop, iAfro lamaPiano.
