Online Reporter
BABEMETHEMBA kakhulu umfowabo odadewabo ababili beleminyaka engu-10 yena eleminyaka engu-29 ngaleso sikhathi. Kodwa esikhundleni sokubavikela, wabaphatha njengabafazi abadala wabadlwengula, baze bakhulelwa bobabili.
Khathesi, indoda le eyadlwengula odadewabo isileminyaka engu-62 ubudala, isijeziselwe ububi eyabenza eminyakeni engu-33 edluleyo.
Okumangalisayo yikuthi amadodana azalwa yilabo bodadewabo ngenxa yokudlwengulwa kwabo khathesi aseleminyaka efanayo laleyo umsolwa ayelayo ngesikhathi ebenza leso senzo.
Umthethwandaba wePhuthaditjhaba eSouth Africa ugwebe indoda le iminyaka engu-15 ejele ingelathemba lokuhlawuliswa ngemali ngenxa yecala eyalenza eminyakeni engu-33 edluleyo.
Isikhulumi samapholisa eFree State, uWarrant Officer Mmako Mophiring, sithe:
“NgoMfumfu ka-1993, odadewabo laba ababeleminyaka elitshumi ubudala ngalesosikhathi babedlwengulwa kanengi ngumfowabo owayeleminyaka engu-29.
Ukuhlukuluzwa lokhu kwaqhubeka isikhathi eside. Lanxa amantombazana abika loludaba kubadala bemuli, akulalutho olwenziwayo ngoba umzali wabo wayegula kakhulu esezakufa.
Bobabili bakhulelwa ngenxa yokudlwengulwa lokhu, njalo ngamunye wabo wazala umntwana ongumfana. Lamuhla amadodana la aseleminyaka engamatshumi amathathu.
Omunye wabo watshona ngomnyaka ka-2019.”
Udadewabo owasindayo, khathesi oleminyaka engu-48 ubudala njalo ongumfundisi wesikolo, ulokhu enakekela amadodana la. Uqhubeka esamukela uncedo lwezengqondo (psychological treatment) ukuze asile ekuhlukumezekeni akubekezelela okweminyaka eminengi.
UMophiring uthe lo, osaphila uveze lokhu kuminyaka eyisikhombisa edluleyo ngemva kokunanzelela ukuthi ubengatholi usekelo kwabemuli kanye lezihlobo.
“Ngenyanga kaMfumfu ngomnyaka ka 2019, eselatshwa ePitoli, waveza ngokuhlukuluzwa kwabezempilakahle, abamncedisa ukuthi ayemangala icala leli emapholiseni.
“Icala leli ladluliselwa kuPhuthaditjhaba Family, Child Protection and Sexual Offences Unit, lapho uDetective Sergeant Mapitso Mofokeng enza khona inhlolisiso.”
Amapholisa athe kwavulwa icala, umsolwa wabotshwa njalo wathonisiswa watholakala elecala.
“NgoMvulo mhlaka 27 Ntulikazi, umsolwa utholakale elecala wagwetshelwa ukuyapika iminyaka engu-15 esejele. Ibizo likamsolwa ligodliwe ngenhloso yokuvikela umamangala kunye labantwana,” kutsho uMophiring. —Ubulembu
