admin
Fairness Moyana
KULESAKHAMUZI seChingonya indawo eseMusuna eHwange esithe sithiye indwangu ebesezihluphile ngokudla amabele sabamba imbuzi zesinye isakhamuzi sakule indawo kwafa eyodwa okudale ukuthi siphethe sibotshelwa ukuthiya inyamazana.
Umsolwa uPiniot Munkuli (68) usile ngemva kokuba umantshi uNkosazana Sharon Rosemani emfumane elecala lokwephula umthetho owenqabela ukuthiywa kwenyamazana nanko phela kasamhambisanga ejele kodwa uthe kumele abhadale.
Umsolwa ucele uxolo kumantshi esithi ubengajonganga ukubamba imbuzi zikamakhelwane wakhe kodwa indwangu ebesezimhluphile emasimini akhe.
“Mhlonitshwa, mina ngithiye ngingajonganga ukubamba imbuzi zikamakhelwane wami kodwa bengijonge ukubamba indwangu ebesezingihluphile ngokungitshontshela izilimo zami emasimini. Ngicela uxolo njengoba sengihlawule umamangala i$30 ngibhadala imbuzi yakhe engiyibambe ngengoda yafa,” kutsho umsolwa.
Umtshutshisi uCharlene Gorerino ubikele umthethwandaba ukuba umsolwa wabamba imbuzi zikamakhelwane wakhe ngenyanga kaMpalakazi kwafa eyodwa.
Kubikwa phakathi kwamhlaka 21 lo 23 Mpalakazi kumnyaka ophelileyo umsolwa wasuka wayathiya ensimini yakhe okwadala ukuthi abambe imbuzi zikamakhelwane wakhe ezimbili kwathi eyodwa yafa enye yaqamula ingoda kodwa khathesi ilesilonda entanyeni. Imbuzi le eyafayo ilingana imali engange $30,” kutsho umtshutshisi uGorerino.
Umantshi uRosemani ugwebe uMunkuli imali engange $60 wathi nxa esehluleka lokhu uzahlala ejele okwamaviki ayisithupha. Amagoda umsolwa athiya ngazo imbuzi zithethwe nguHulumende ngokusemthethweni.
Online Reporter