admin
Nkosilathi Sibanda
AMALUNGA oqobo eqembu leHighlanders azabe engadlanga nkotshane ngeSonto mhla esithi gwaqa enkundleni yeClub House okukhangelelwe ukuthi kukhulunywe iqiniso ngodaba lukamqeqetshi uErol Akbay.
Kungabe kukhona okuzabikwa mhlalokho okuhlelwe liqula elikhokhelwa ngumgcinisihlalo uPeter Dube kodwa indaba esegudwini ngeyokuza kukaAkbay lamalungiselelo esizini ka2016.
Kusukela ngeviki lesibili likaZibandlela, iBosso iqhubeka isenza amalungiselelo okudinga abadlali kungela mqeqetshi oqhatshiweyo okusemthethweni.
Akwaziwa ukuthi yibaphi abadlali asebesayine lethimu njalo akulaqiniso lokuthi umqeqetshi lo ozabuya uzabathanda abadlali asebelolongwe nguCosmas Zulu loMelusi Sibanda.
Abaqeqetshi laba behlangene loAmin Soma-Phiri abasoke beqhubeke leqembu elikhulu ngokutsho kukamaqhuzu uNdumiso Gumede.
Kumbiko ethunyelwe yiHighlanders kuliviki, iqembu leli lithe umhlangano wangeSonto ngowokukhangela umumo wethimu ngesizini ka2015, ukuhlaziywa lokuguqulwa kwesisekelo sombuso lokunye.
Umbiko lo welule njalo ukuthi iHighlanders izakuba lokhetho lwabakhokheli kuzikhundla ezibalisa umsekeli kamgcinisihlalo lomgciningcebo.
UMthunywa ubuzisise abalandeli boqobo mayelana ngokukhangelelwe kulumhlangano. Abalandeli bathe umbuthano lo kumele ukhulume ngekusasa yethimu hatshi ukutshonela ukubala okwenzakala kudala.
UMeluleki Sikhosana oseGwanda uthe: “Siyeza ngobunengi bethu kulumhlangano silande ukuzokhuthaza abakhokheli bethu ukuthi baqakathekise ubusekeli bethu. Asifuni ukuthi sihlalele ukuzwa ngezinto esizaziyo.
Abasitshele ukuthi bazathenga yini abadlali ababukhali kulisizini.”
Inengi labasekeli abakoBulawayo libika ukuthi lizakhetha ukumisa umhlangano nxa kungakhulunywa ngomqeqetshi omutsha.
“Umqeqetshi lo abathi uyeza simuzwa kumaphephandaba. Sifuna ukwazi ukuthi umlungu (Akbay) ungaphi.
“Kanti yithimu bani ezafuna ukukhethela umqeqetshi abadlali?” kubuza uKlose Ndimande olilunga logatsha lweBulawayo Chapter, olwabasekeli bakaMantengwane.
Umhlangano weHighlanders lo uza ngesikhathi abasekeli abaseVictoria Falls sebebophe isinqumo sokuthi bazancedisa ngemali iqembu lama-Under 19 eselingene kuligi ka-Division One kumhlubulo ongezansi yelizwe kulisizini.
Inyathelo lokutshintshwa kwesisekelo sombuso kubikwa lidalwe yikuthi sekuvela ukuba kulokudonselana kwezikhundla phakathi kwequla le-executive labadala bethimu abakubhodi.
Online Reporter