marble nkomo
Nkosilathi Sibanda
AMAPHOLISA eGwanda, esabelweni seMatabeleland South abophe enye indoda ngemva kokutholakala ilime izihlahla zembanje ezingu-102 emasimini ayo duzane lomfula uKafusi ku-Village 6.
Kubikwa indoda le, uNuni Ngulube yeGwanda, ibifihle imbanje phakathi kwensimu yomumbu ngenhloso yokuthi ingabonakali lula.
Kodwa amapholisa athe sethole udletshana ngesenzo sikaNgulube, afika emzini wakhe amthatha wahamba labo ensimini yakhe lapho afika wabatshengisa indawo ayelime kuyo imbanje.
Ekufikeni kwabo emasimini bathole izihlahla zembanje zigcwele phakathi komumbu, ezinye zinde okwesilanganiso semitha, ikanti ezinye zifika kumamitha amabili.
Amapholisa azisiphune zonke izihlahla zembanje ezingu-102 phambi kukamsolwa lomkakhe uBeauty Sakhala Ncube.
Isikhulumi samapholisa esabelweni seMatabeleland South u-Inspector Chiratidzo Dube uthe icala seliphenywa njalo umsolwa usebotshiwe.
“Salunywa indlebe njengamapholisa saphenya. Umsolwa wavuma ukuhamba lathi lapho ayehlanyele khona imbanje. Sithe sifika sathola insimu igcwele imbanje ezazivalelwe phakathi komumbu ukuze zingabonakali,” kutsho u-Insp Dube.
UDube uxwayise uzulu ukuthi ukuhlanyela imbanje okungekho emthethweni kulicala elinzima.
“Umuntu wonke ohlanyela imbanje okungekho emthethweni uzahlangana lesijeziso somthetho.”
Amapholisa aphinde anxusa uzulu ukuthi asebenze ndawonye lawo ekulwiseni ukusabalala kwezidakamizwa, ikakhulu phakathi kwabasakhulayo.
Online Reporter