admin
UBRUCE Grobbelaar owake waba ngunozinti weqembu leHighlanders usekhonjiswe yisizwe seMalawi esifuna ukuthi abengumqeqetshi weqembu elikhulu lakulelo.
UGrobbelaar wakha udumo lwakhe kunguqu esadlalela amaWarriors leBosso andubana ayelwakha njalo kuLiverpool, eNgilandi.
Imbiko ephuma kunhlanganiso yeFootball Association of Malawi (FAM) ibika ukuthi uGrobbelaar uhamba phambili kumabizo alabo abakhankasela ukuqhatshwa.
UMthunywa ukubika ngobufakazi obukhulu ukuthi uGrobbelaar unqobe abanye abaqeqetshi abaphuma emazweni alendumela yokuphumelela kunguqu. Abaqeqetshi abadinge umsebenzi lo bafika amatshumi ayisithupha lanhlanu.
Phambili kokuba kudingwe umqeqetshi omutsha, iMalawi ibiqeqetshwa nguEarnest Mtawali owakulelo.
Kubikwa kuyinhloso yeFAM ukuqhatsha umuntu ololwazi lwenguqu njengoGrobbelaar njalo phakathi kwalinhlanganiso. Kuzwakale ukuthi zonke inkokheli zivumelana ukusebenza lonozinti lo owahlanyisa inengi lababukeli benguqu ngeminyaka yama-1990s.
Umongameli weFAM uWalter Nyamilandu uthe angeke atsho ukuthi uGrobbelaar uzaqhatshwa kodwa umqeqetshi omutsha uzaqanjwa ngoZibandlela.
“Kumele sibelomqeqetshi omutsha ngomnyaka ozayo ngoba sizaphatheka kumqhudelwano wenkezo yamazwe oweChampionship of African Nations (Chan) ozaqhutshwa ngoMabasa.
“Amalunga enhlanganiso yethu avumelane ukuthi phakathi kwabaqeqetshi abazakhethwa ekucineni, kumele abahlanu kube yilabo abaveLa kwamanye amazwe,” kubika uNyamilandu. — Ubulembu
Online Reporter