Ubukhokheli obutsha kuGoat Breeders Association

Umgcinisihlalo we Boer Goat Society of Zimbabwe uXolisani Mpofu

Judith Phiri

AMALUNGA enhlanganiso yeGoat Breeders Association of Zimbabwe (GBAZ) asekhethe inkokheli ezintsha kuhloswe ukuthuthukiswa kwendlela zokufuya imbuzi elizweni.

Inhlanganiso le yasungulwa ngomnyaka ka-2018.
Iqula elikhethiweyo lizakhokhelwa ngumgcinisihlalo uMnumzana Ntandoyenkosi Ndhlovu esekelwa nguNkosazana Yvone Sibanda loMnumzana Tinashe Nyangari.

Abanye abakukhomithi nguNkosikazi Sifiso Agbetorwoka, uMnumzana Naboth Mutambanengwe, uMnumzana Khumbu Makhetho, uMnumzana Mavron Siziba, Providence Shoko loMbuso Nyathi.
UNdhlovu uthe uzizwa ehlonitshwe kakhulu ukukhethwa ukuba ngumgcinisihlalo.

“Ngibonga bonke abaphatheke kulolukhetho. Ngizasebenza kuhle lequla elitsha. Ngo2026 kusiyaphambili iGBAZ ikhangelele ukuthi ikhulise ibhizimusi lokufuya imbuzi zomdabu ezigoqela imihlobo yeMatabele leMashona kunye lezeBoer, Kalahari Red leSavanna,” kutsho uNdhlovu.

Uthe bazancedisa abafuyi bembuzi abasacathula abasemaphandleni ikakhulu abesifazane.
“Kumele ilizwe lifike isibanga sokuthi lenelise ukufuya imbuzi ezizathengwa phetsheya. Sifuna abafuyi bonke baphatheke kulokhu.

Umgcinisihlalo weGoat Breeders Association of Zimbabwe uNtandoyenkosi Ndlhovu

UNdhlovu ubike ukuba bazaphathisa njalo ngokwabela izakhamizi ulwazi ngokufuya imbuzi lokuba yingxenye yembukiso efana leZimbabwe International Trade Fair (ZITF).

“Sidinga abafuyi abafuna ukuba lathi kuloluhlelo. Sesinanzelele ukuthi inengi labafuyi emaphandleni liswela ukuncediswa kubhizimusi lembuzi.

“Inengi lifuyela ukuba lokudla kwemuli zabo. Kumele sifike lapho umuntu wonke esefuya ngenhloso yebhizimusi.”