marble nkomo
Ethel Ncube
NGENXA yokungafuni ukwaliwa, kulendoda ethe ngemva kokwaliwa yayabulala indoda ebisithandana “lentombi” yayo.
Isehlakalo lesi senzakale koGutu ngempelaviki.
Umuyi, uAbraham Mupagore ubevela eKaroi evakatshele isithandwa sakhe, aze abulawe emzini wesithandwa sakhe, eChiguhune.
Kuvele ukuba inina eliphakathi kwaloludaba, uModester Fushai (22), usebenza njengomgcini wesitolo eChiguhune Business Centre. Umetheswacala uTakura Mabhugu kubikwa laye ulesitolo kuleyondawo.
Kubikwa izitolo lezi ziseduze duze.
Kuthiwa ngoMgqibelo, uMupagore wasuka eKaroi waya eChiguhune, ibanga elingaba ngamakhilomitha angu-430, esiyabona isithandwa sakhe uFushai.
NgeSonto, izithandani lezi, uFushai loMupagore baya ebandleni leZion Apostolic Church lapho umufi atshumayela khona. Ngemva kwenkonzo babuyela ngekhaya. Kubikwa uMabhugu wezwa udletshana lokuthi isithandwa sakhe silenye indoda, wabalanda lapho ababekhona. Kuthiwa Fushai, owayengasamfuni uMabhugu, wamazisa ngendoda yakhe entsha.
Amadoda la akhulumisana ngendaba le, kodwa kwaba lokuphikisana okukhulu kanti vele uMabhugu usethukuzele uMupagore induku emqubeni.
Bathe ababili laba sebeliswa, uFushai wabaleka wabatshiya. UMabhugu ebona ukuthi usehlulwe, wathatha ifotsholo watshaya uMupagore waze wafa. Wasegebha igodi ensimini, wangcwaba isidumbu.
UFushai wabuya ngosuku olulandelayo wafica kungelamuntu njalo isikhwama sikaMupagore sasingasekho, kodwa wabona igazi emnyango wendlu. Watshayela izihlobo zikaMupagore ucingo ezibuza ukuthi engabe efikile yini kodwa zamazisa ukuba kaphendukanga eKaroi.
Omunye umakhelwane wathi enanzelela inyawo ezingajwayelekanga wazilandela waze wayafika ensimini yomumbu lapho athola khona indawo eyayisanda kugejwa kwagqitshelwa ngehlabathi yaphinda yathelelwa ngamanzi ukuze kufihlwe umkhondo.
Kwabikelwa amapholisa abuya azohlolisisa kwatholakala isidumbu sikaMupagore.
Umetheswacala Mabhugu kubikwa loba wabaleka kodwa usesezandleni zamapholisa.
Isidumbu sahanjiswa eGutu Mission Hospital ukuze siyehlolwa imbangela yokufa.
Obambele isikhulumi samapholisa eMasvingo, uAssistant Inspector Maseuso Patinyu uqinisekise ngecala leli.
Online Reporter