admin
Thokozile Mbedzi
KULENDODA yesigabeni seNsiza eFilabusi emangaze izakhamizi zakule indawo nanko phela bekungathi isifikelwe ngumoya wokubulala njengoba ihlahlele enye ngehloka yaphinda yatshaya enye ngesitina.
Umetheswacala uRabson Siziba oleminyaka engu-18 yokuzalwa wesiqintini seSiwaze kubikwa wafica uAdam Dlamini oleminyaka engu-37 esotha umlilo lapho okwakusakhiwa khona isitolo wafika waqala ukumthethisa.
Kubikwa uAdam wacunuka wasuka emlilweni kodwa uRabson wamlandela wafika wamgamula.
Kubikwa uRabson wawela phansi waqaleka.
UBornwell Masuku laye wazama ukuthi alamule laye watshaywa ngesitina walimala kakubi.
Ekhuluma lentatheli kaMthunywa uMnumzana Thandanani Nyathi uthe lokhe ethukile njalo lokho okwenzakalayo lokhu ekubona ngelihlo lengqondo.
“Lokhe sikhakhamele ngitsho lamadoda ayekhona ngesikhathi kusenzakala ababaza angaqedi.
“URabson wasifica nje abanye besakha abanye njalo besotha umlilo. Waqala ukuthethisa uAdam, loba wazama ukumtshiya kodwa wamlandela wafika wamhlahlela ngehloka wahle wawa waqaleka.
Kubikwa uMasuku wathi ebona lokhu wagijima ezama ukuya balamula kodwa uRobson wamphendukela wadobha isitina wamtshaya laye.
Ababili laba bahle bagijinyiselwa esibhedlela ngokuswela kwenhlanhla uAdam wedlula emhlabeni ngemva kwensuku ezintathu.
Isikhulumi samapholisa esabelweni seMatabeleland South uLoveness Mangena ebuzwa ngodaba lolu uthe solufikile ehofisini yabo.
“Sixwayisa uzulu ukuthi ekele ukuhamba ethwele izikhali eziyingozi ngoba lokhu yikho okubangela ukulahleka kwempilo.
“Sithanda ukukhumbuza uzulu ukuthi nxa kusuke kwaba lokungazwani kababikele amapholisa loba abaphathi bezigaba babaphathise kulokuthi silahlekelwe yimpilo,” kuphetha uInsp Mangena.
Online Reporter