admin
YiNtatheli kaMthunywa
KULENDODA yelokitshini leNkulumane koBulawayo eleminyaka engu-42 yokuzalwa egwazwe yabulawa, yahlubulwa impahla andubana isidumbu sayo siphoselwe emgwelweni ogeleza amanzi esititshi.
Impahla zendoda le, ezilegazi kanye lezicathulo zitholakale kwezinye izindlu eziseduzane lalapho okuphoselwe khona isidumbu sayo ngoMvulo.
Kubikwa uMduduzi Ngwenya wasuka endlini yakhe ngeSonto ngehola lika 11 ebusuku edakiwe njalo kazange atshele umkakhe ukuthi uyangaphi.
Isidumbu sathwalwa sasiwa esibhedlela seMpilo Hospital ukuze siyehlolwa imbangela yokufa.
Isikhulumi samapholisa koBulawayo uInspector Abednico Ncube uthe amapholisa lokhu esachwayisisa njalo ucele amalunga omphakathi angabe elolwazi olungaphathisa ukuthi ababulali laba babotshwe ukuba bayebika enkambeni yamapholisa eseduzane labo.
“Umuyi yindoda eleminyaka engu-42 obehlala elokitshini leNkulumane koBulawayo njalo ubengasebenzi. Mhlaka 12 Mpalakazi ngehola lika 11 wasuka endlini waya lapho okungaziwa muntu njalo kazange atshele umkakhe,” kutsho uInsp Ncube.
Uthe mhlaka 14 Mpalakazi ngehola lika 7 ekuseni ipholisa elalisemsebenzini lamukela ucingo olwalubika ukuthi kulomuntu ofileyo emgelweni.
Uthe isidumbu satholakala sihlubulwe impahla njalo besilamanxeba okugwazwa ebunzini.
“Ubelamanxeba atshonayo amathathu ebunzini, esubukile entanyeni kanye lesifubeni. Impahla zakhe ezigoqela ibhulugwe elimnyama, isicathulo esimnyama esisodwa bekuphoselwe egumeni kwenye indlu eNkulumane koBulawayo.
“0Sicela ukuthi ongabe elolwazi olungasiza amapholisa ayefika enkambeni yamapholisa aseduzane laye,” kutsho uInsp Ncube.
Online Reporter