admin
YiNtatheli kaMthunywa
KUTHOLAKALE abantu abangu-36 asebebanjwe ligcikwane leCovid-19 koBulawayo osekusenza idolobho leli libe labantu abangu-483 asebetholakale belomkhuhlane lo.
Kumbiko wogatsha olubona ngezeMpilakahle kanye lokondliwa kuhle kwabantwana, kulabantu abangu-133 abatheleleke nge-Covid-19 elizweni lonke jikelele okwenza inani labantu asebebanjwe umkhuhlane lo elizweni libe ku-1 611. Inani labantu asebedlule emhlabeni ngeCovid-19 sebengu-25.
Idolobho lakoBulawayo yilo elihamba phambili ngokuba labantu abanengi abatholakala beleCovid-19.
Kusenjalo kulabo abavela kwamanye amazwe kutholakale abangu-17 abalomkhuhlane lo, bonke bavela kweleSouth Africa.
Idolobho leHarare libe labantu abangu-57 ababanjiweyo, phakathi kwabo abangu-42 ngabangazange bake bavakatshele kwamanye amazwe kukanti abangu-15 ngabavela kwamanye amazwe. Isabelo seNkabazwe sona sibe labantu abangu-38 abathelelekileyo njalo bonke kabazange bavakatshele kwamanye amazwe. Kube sokucina isabelo seMatabeleland North leManicaland.
Mhlaka 19 Ntulikazi kube labantu abangu-133 ababanjwe iCovid-19. Inani leli ligoqela labangu-17 abavela kweleSouth Africa kanye labangu-116 abangazange bavakatshele kwezinye indawo asebehlala bodwa.
Phakathi kwabo, abangu-22 ngabake bathintana labanye ababanjwa umkhuhlane lo kukanti kusadingisiswa ukuthi laba abanye abangu-94 bangabe bewuthethe ngaphi lumkhuhlane.
Online Reporter