admin
Cornelius Luphahla
INHLANGANISO ekhangela ngezokulondolozwa kwemvelo i-Environmental Management Agency incoma uBulawayo ngokuhlanzeka njalo ukhuthazwa ukuthi aqhubekele phambili.
Lokhu kuvezwe nguMqondisi wale inhlanganiso edolobheni lakoBulawayo uMnumzana Decent Ndlovu emkhankasweni wokuhlola ukuhlanzeka edolobheni lakoBulawayo obukhona mhlaka 15 Mpalakazi.
Ekhuluma kulo umkhankaso uMnu Ndlovu uveze ukuthi iKhansili yakoBulawayo iqhubekela phambili ngokuhlanza idolobho noma ezinye izakhamizi zisasilela.
“Indlela ikhansili yakoBulawayo ethuthuka ngayo ngokuhlanzeka kuveza ingqubekela phambili. Ngitsho ngoba khathesi emalokitshini amanengi akusatholakali ingcekeza ilahliweyo kodwa zonke izibi sezithwalwa ngezimota ziyelahlwa lapho okufanele zilahlwe khona.
“Ngalokhu ngikhuthaza iKhansili ukuthi iqhubekele phambili ngomsebenzi lo ewenzayo ngoba muhle kakhulu. Noma kunjalo ilokitshi leMakokoba kukhanya liqhubekela phambili ngengcekeza ngoba minyaka yonke lihlala lingahlanzekanga. Ngokunjalo ngikhuthaza izakhamizi zakulelilokitshi ukuthi zihlanze indawo yazo,” kuveza uMnu Ndlovu.
“Noma kunjalo sizaqhubekela phambili sihlawulisa labo abalahla izibi butshapha bazaze bawulahle umkhuba wabo lo ngoba yibo abangcolisayo,” kutsho uMnu Ndlovu.
Ekhuluma lentatheli uActing Cleansing Superintendent Nkanyiso Ndlovu uthe okwenza bathuthuke ekuhlanzeni idolobho yikuthi sebethutha izibi maviki wonke ngoba sebesenzisa imota zezakhamizi.
“Okwenza sithuthuke ngamandla ekuhlanzeni idolobho yikuthi khathesi sesisenelisa ukuthutha izibi maviki wonke. Lokhu kungenxa yokuthi saqhatsha izakhamizi ezilama-lorry amakhulu ukuthi zisithwalele izibi ziyezibeka ndawonye lapho imota zethu ezizithathela khona.
“Lokhu kwenza kubelula ukuthi sithwale izibi lezi maviki wonke ngoba imota zethu kazisabhodi emalokitshini zithwala izibi. Okunye njalo icebo lokuqhatsha izimota zokusithwalela lenza singasebenzisi amafutha amanengi ezimoteni zokuthwala izibi ngoba sezihamba umango omncane. Ngalokhu siyathembisa ukuqhubeka sihlanza idolobho,” kutsho uMnu Ndlovu.
Online Reporter