admin
Thokozile Mbedzi
ZISELE zitshe amathe izakhamizi zesigabeni seMamamusi eNtalale eGwanda ngemva kokuzwa ngosane olugalule lwafa emfuleni kulandela ukukhululeka kwembeleko ebelubelethwe ngayo lwabhudlukela phakathi.
Inkemekeme le yenzakale ngoLwesine kuviki ephelileyo lapho uNkosazana Sarah Dube (58) abebhabhule khona uThabiso Modisa olomnyaka lenyanga ezintathu.
Iphephandaba likazulu lizwe ukuthi umuyi ufe ngemva kokuwela phakathi komfula okubangele ukuthi agalule afe ngesikhathi uDube echapha laye umfula.
UMthunywa uxhumane loMnumuzana Oliver Tlou oyisakhamuzi sakule indawo wathi laye wancedisa ukukhipha umntwana lo emanzini njalo kalamathe ngalesisiga.
“Kangilankani ngesiga lesi esehlele uMaDube njalo ngangingakholwa ukuthi liqiniso ngaze ngakholwa sengibona sesimthola esemanzini. Amanzi la amkhukhula saze sayamthola emangweni ongamamitha angu-50.
“Lokhu kwamangalisa umuntu wonke ngoba isifula lesi sincane kakhulu okokuthi ngeke ucabangele ukuba singathwala umuntu,” kuveza uMnu Tlou.
Ebuzwa ngale indaba uNkszn Dube uthe yena wayevela emasimini izulu lisanda kuna wathi echapha isifula watshelela wawela emanzini umntwana wawela phakathi wahle wathathwa ngamanzi.
“Mina ngangivela emasimini ngathi ngichapha isifula ngibhabhule umntwana nganyathela ilitshe ngatshelela ngawela emanzini. Imbeleko engangibhabhule ngayo umntwana yakhululeka okwadala ukuthi umntwana awele phakathi kwamanzi.
“Ngavuka ngazama ukumenyula ngehluleka ngoba amanzi ayegijima kakhulu. Ngamemeza omakhelwane babuya bazongincedisa ukumdinga kodwa kwaba ngumnyama ngoba samthola sefile emanzini. Lokhu kwangethusa kakhulu njalo lokhe ngithithibele,” kulandisa uNkszn Dube.
Isikhulumi samapholisa esabelweni seMatabeleland South uAssistant Inspector Nkosilathi Sibanda ebuzwa ngale indaba uthe sebeyizwile njalo bakhuthaza uzulu ukuthi ananzelele ingozi zamanzi ngoba izifula ezinengi kazila mabholoho.
“Indaba yomntwana ogalule emanzini wafa sesiyizwile ngakho sikhuthaza uzulu ukuthi aqaphele ingozi zamanzi ngoba ziyanda njengoba izulu lisina.
“Okunye njalo izakhamuzi kazinanzelele zingangeni ezifuleni ezilamanzi lanxa zizincane funa zehlelwe yingozi efana lale,” kuphetha uAsst Insp Sibanda.
Online Reporter