admin
Thokozile Mbedzi
ZILOKHU zinkemile izakhamizi zeHope Fountain ngemva kokuba enye indoda iganyulwe yafa ngoMgqibelo odluleyo kulandela ingxabano ngemali yesondlo.
Kubikwa uMbongeni Ntshali wahamba lodadewabo, uZibusiso Ntshali esiya kuCabangani besiya khulumisana ngemali yesondlo kodwa bathola uChristopher okungasatholakalanga isibongo sakhe, ohlala loCabangani enkomponi.
Kubikwa uNtshali wafika wathi udinga uCabangani, uChristopher wathi kakho njalo ababili laba kabavunyelwa ukungena enkomponi le bahle baqala ukungazwisisani. Kuzwakale ukuthi khonokho nje uChristopher wangena egijima endlini waphuma esephethe ikhuba alisebenzisa ukugamula ngalo uTshali ikhanda lembambo ethi ikhiwa kalifuni bantu abafika lapho kungelamvumo.
Ekhuluma lentatheli kaMthunywa uMnumzana Mbulelo Moyo uthe balokhu betshe amathe ngesenzo sikaChristopher.
“Silokhe sithithibele silapha ngokwenzakeleyo, njengoba uChristopher lanxa bekungalandwanga yena uhle wathatha indaba yaba ngeyakhe waqala ukubabuza ukuthi balandeni umuntu abamdingayo engekho.
“Ngesikhathi exabana labo wayesithi bazayifunda ivaliwe. UChristopher njengomuntu owayephansi kwendlu yakhe wangena endlini etshitsha waphuma esephethe ikhuba agamula ngalo uMbongeni walimala ekhanda kanye lembanjeni,” kutsho uMnu Moyo.
Uqhubekele phambili esithi njengezakhamizi lokhu bengakuzwisisi ukuthi kambe kungaze kube lesidumbu phansi kubangwa nje isondlo.
“Sinjenje lokhe singakuzwisisi ukuba bangaze babange isondlo somntwana kuze kufe umuntu khona kungayisuye futhi obelandiwe.
“Asazi sibili ukuthi uChristopher bekumkhathaza ngani ukufika kukaMbongeni lodadewabo njalo bekungayisuye obekumele abhadale imali yesondlo somntwana aze abulale umuntu.
“Njengezakhamizi sizibuza imibuzo engadingi mpendulo ukuthi kambe ngamagama bani abesekhulunyiwe, khona vele ubengenelani indaba engelani laye. Kuyethusa nxa sokusiba lokubulalana njalo sokudalele izihlobo eziseleyo ubunzima. Lokhu sokudale inzondano enkulu ezimulini kodwa ngithemba bazakhulumisana,” kutsho uMnu Moyo.
Ekhuluma lentatheli ecingweni unina kamufi uShiella Samawuso uveze ukudana ngesiga lesi.
“UMbongeni wathi esuka lodadewabo kabazange bafonele uCabangani ngakho bathi befika uChristopher wahle wabasukela wathi ikhiwa kalifuni bantu abangahlali lapho wahle waqala ukuxabana lababili laba.
“Ngemva kwalokho wangena endlini wabuya lekhuba ahlasela ngalo umntanami ekhanda, inxeba elibe libi kakhulu lasembanjeni. Ngabona igazi lingene phakathi ebuchopheni ngoba bekutshone kakhulu,” kuchaza uNkszn Samawuso.
Imizamo yokukhulumisana lesikhulumi samapholisa yehlule.
Online Reporter