admin
NguThando Mpofu
KUDABA olutshiye izakhamizi zeDandanda zitshe amathe kulendoda edakwe yazikhohlwa yasiseqa enqoleni yafa isithi ibalekela inyoka.
Umuyi uZingani Ndebele obeleminyaka engu-30 weqa enqoleni yomunye umakhelwane wafa ngemva kokuba yethuswe lugatsha obelulenga esihlahleni isithi yinyoka.
Isehlakalo lesi senzakale mhlaka 11 Nhlolanja umuyi evela komunye umuzi lapho abenatha khona ithothotho.
Kuzwakale ukuthi ngalelolanga ilanga selisiya ngomtsha wendoda umuyi wahlangana lomtakamakhelwane esenqoleni wacela ukugada nanko phela lapho ayesiya khona kwakukhatshana.
Kubikwa bathi besendleni badlula eduzane lesinye isihlahla esasilogatsha olulombala ofana lowebululu.
Kuzwakale ukuba uNdebele watshaywa luvalo esithi yinyoka kungakho waseseqa watshayelela phansi ngekhanda.
Umntakamakhelwane uthe ebona ukuthi uNdebele wayeselimele wagijima wabiza izakhamizi ezaziseduzane laleyondawo.
Kubikwa uNdebele wathwalela esibhedlela wasebhubha ngemva kwamalanga amahlanu.
Isikhulumi samapholisa uAssistant Inspector Siphiwe Makonese uthe basaludingisisa udaba lolu.
Kusenjalo, kudaba olusegudwini kulendoda yeLupane ephenduke esitikini sokufa ngemva kokugxotshwa yindlovu.
Lindoda edabuka esiqintini seSipopoma uEnoch Mathe oleminyaka engu-46 kubikwa walandelwa yindlovu le esuka emasimini yaze yamfikisa emzini wakhe lapho eyafika yadiliza indlu ayehlezi kiyo lemuli yakhe yasimgxoba.
Isimanga lesi senzakele ngoLwesithathu ngeviki edluleyo. Iphephandaba likazulu lizwe ukuba uMathe kananzelelanga ukuthi wayelandelwa yindlovu le.
Kubikwa indlovu le yadlula imizi eminengi andubana ifike emzini kaMathe lapho eyafika yadiliza umnkulu lapho ayehlezi khona lemuli yakhe.
Kuzwakale ukuba uMathe wathi ezama ukubaleka indlovu le yambamba ngomboko wayo andubana imtshayelele phansi yasimgxoba.
UMathe kubikwa wagijinyiselwa esibhedlela seSt Lukes lapho athola khona uncedo.
Online Reporter