Online Reporter
Zimpapes Sports Hub
KUZWAKALE umsindo wombhobho, kwalimala abalandeli ababili enkundleni yeMaglas, eZvishavane ngesikhathi kudlala iShabani Mine leGwanda Pirates, kumdlalo weZifa Central Division One ngeSonto.
Kubikwa kulomlandeli welinye lamaqembu la ogwaze omunye umdlalo usaqhubeka. Akuhlalanga isikhathi eside, kuhle kwaqhamuka umsindo sekujikwa amatshe, okudale ukuthi unompembe amise umdlalo, sekudlalwe imizuzu engu-68.
Omunye umdlali weGwanda Pirates uphinde wakhipha umbhobho, wadubula phezulu, abanye abalandeli bathela usikomitshi womdlalo ngotshwala.
Kulandela lokhu, inhlanganiso yeZimbabwe Football Association (Zifa) isikhiphe umbiko ngesehlakalo lesi.
“Siphatheke kabi kakhulu ngokwenzakeleyo. Imicabango yethu ikulabo abahlukumezekileyo lemideni yabo ngalesi isikhathi esinzima.
“Ibhola kumele lihlanganise abantu – lingalokothi libe yimbangela yokulimala, ukwesaba kumbe ukwehlukana. Okwenzakeleyo kuyakhathaza kakhulu futhi akwamukeleki,” kutsho i-Zifa.
Iqhubeke yathi: “IZifa iluthathela phezulu loludaba njalo isisungule uphenyo olugcweleyo njalo oluzimeleyo ukuze kutholakale ukuthi yiziphi izimo ezidale ukuthi kube lokuhlasela. Ngakho-ke siqala leli inyathelo lokulungisa ngokuphangisa.”
