Online Reporter
YiNtatheli kaMthunywa
KUVUKE impi phakathi kwamadoda ayizelamani amathathu lapho okugwaze eyinye, kubangwa ukuthi ukhona “ojola” lekhosikazi lomunye.
UBrighton Ncube ohlala eNkulumane ugwaze umfowabo uThulani ngesikhathi emfica esilwa lomunye umfowabo u-Albert.
Isiga lesi senzakale ngoMvulo ekuseni, ngeviki edluleyo.
Abafakazi abaqotho babike ukuba isisusa sodaba yikuthi uBrighton wayelamula abafowabo uThulani lo-Albert. UThulani kubikwa wayecabangela ukuthi u-Albert “umudla izithende” ngokuthandana lomkakhe, kodwa uvuke ulaka waphumisela ukuzonda kwakhe lapho ebona imilayezo yothando efonini yomkakhe, ivela ku-Albert.
“Ufike wazithela phakathi kwendlu etshinga esithi ‘ulala lomkami wena’ ekhomba u-Albert,” kutsho omunye umakhelwane owesabe ukuqanjwa.
U-Albert walile konke lokhu. Kuthe kuzama ukulamula omunye umfowabo uBrighton, kucine sekukubi.
“UBrighton uzame ukubakhuza kodwa kukhanya uphambanise ngokuvumelana lo-Albert. Kwenza isimo sabheda. Sibone uThulani esesopha igazi, esegwazwe esifubeni nge-screwdriver nguBrighton.
UBrighton uhle wacela ezinyaweni..
Kubikwa uThulani wathi daca phansi, umkakhe wahlaba umkhosi, ebiza omakhelwane.
“Ngibone uThulani eselele phansi, ebubula ngobuhlungu,” kutsho omunye umakhelwane uMnumzana Mpofu.
Kwabizwa amapholisa eTshabalala, uThulani wagijinyiselwa esibhedlela seMpilo, lapho athola khona ukwelatshwa.
Amapholisa abika ukuba aphezulu kokudinga uBrighton, okubikwa ulokhe engakabonakali lakhathesi.
