admin
PINENGI lamadoda, ikakhulu abakhule ensukwini zayizolo abathandi ukuthi omkabo baqhatshwe kungaba kumankampani kaHulumende kumbe lawo azimele wodwa, phela inengi lilengqondo yokuthi nxa owesifazana eziholela imali yakhe, indoda uzayithobela njani, ayiguqele kanjani.
Kwesinye isikhathi uthole ukuthi umama uhola ngcono kulobaba, kuyabe sekungathi sekukhala esikamama kuleli khaya.
Bakhona njalo omama abangehlukanisi ubuqhuzu babo bemsebenzini, babuthwala baze labo ngekhaya, ufice nxa ephethe emsebenzini enguye obatshelayo, ebalawula lekhaya kube yiso leso indoda iphenduke utitisi umdlwane wabondlebe zikhanyilanga wona ongakhuliyo.
Ngikhumbula omunye umngane wami owayesebenza engumcuphi wayethi noma esesendlini uthole ehalada indoda sekungani ukhuluma lomgulukudu wesigebenga kanti cha.
Phela wayesejwayele ukuhwabhela izibotshwa, akhohlwe ukukhumula ijazi lobucuphi nxa esefika ngekhaya, embathe elobunkosikazi eliphuphuma ngothando, inhlonipho lesizotha, athobele aguqele umkakhe.
Mhlawumbe amadoda amanengi avela akuthatha ngesiko lethu lomdabuko ukuthi indoda yiyona nhloko yomuzi, yiyo okumele izingele inswelo zekhaya, pho-ke ngempilo yalamhlanje into sezaguquka labesintwana sebaba lamuthuba alinganayo, kodwa hatshi ezindlini abafuni kuyizwa leyo omama abanengi.
Yikho nje inengi lamadoda lithanda ukuzithathela omkabo abangafundanga okumangalisayo noma esebenza kube ngumsebenzi ongatsho lutho ozakwenza ukuthi kukhanye ukuthi ngubani inhloko yomuzi ngoba zonke indingeko zibikwa kuye ngitsho sibi seyetshukela lakomamazala icelwa kunhlokoyomuzi, ithabe ibe manzi te indoda ngoba izibona ukuba yinduna.
Bakhona njalo abanye obaba abayibo abathuma omkabo ukuthi bacine bedinga umsebenzi ngobutshapha babo emalini, ahole atshaphaze iholo lonke ephuza ugologo labomahotsha abantwana beyatha ngendlala, acine umtanabantu efinqa izidwaba adinge umsebenzi esebona ukuthi wendele kugabhali yavuza ngeke athelele ngalo isivande sakhe.
Enye into eyesatshwa ngamadoda amanengi bahlezi belengqondo yokuthi inengi labafazi abasebenzayo kulula ukuthi liwule ngoba engabonwa muntu ngekhaya omakhelwane labantwana bazabona, njalo kwesinye isikhathi umama abengumaqhuzu aphiwe mhlawumbe lemota indoda ingela nxa kuyindoda othola isivulela unkosikazi igedi kuyabe kungani sekunxele kodwa yiyo phela impilo yalamhlanje kwamukele, sesadlula kuleziya nsuku.
Nxa uqondane losebenzayo thandanani njalo lihloniphane lincedisane lapha lalaphaya lawe mama ongasebenziyo ncedisa umkakho minengi imisebenzi yezandla kungaba yikufuya inkukhu ingqe yini engakulethela imali, phela ikhaya isikhathi esinengi kungasilela imali kulula ukuthola kuliwa sokuthiwa ukhona odlalisa imali yona ivele ingekho.
Ayixabene.
0714355641
Online Reporter