admin
Fairness Moyana
KULENDODA yeHwange egwetshelwe ukuyahlala ejele okweminyaka engu-12 ngemva kokutholakala ilecala lokudlwengula unkosikazi womunye asebenza laye wamupha isivalamlomo samamengo.
Umsolwa uAuditor Munange oleminyaka yokuzalwa engu-37 ohlala ku P122 esigabeni seLwendulu eHwange umuswe emthethwandaba kuyonale iviki phambi kukamantshi uDambudzo Malunga.
Umtshutshisi kulelicala ubikele inkundla ukuthi mhlaka 24 Zibandlela kuwonalo umnyaka ngehola lika-11 ekuseni umsolwa wavakatshela umka-mamangala, uDumisani Zulu edinga ulwazi lokuthi angatshisa njani amalahle ukuze abe yi-coke.
Kubikwa uZulu wathi umsolwa abuye ngelanga elilandelayo ukuze ayemtshengisa.
Inkundla izwe ukuthi ngelanga elilandelayo umsolwa watshela uZulu ukuthi athi unkosikazi wakhe abuye emzini wakhe azothatha ama-guava. Kubikwa ngemva kwemini umamangala wahamba emzini kaZulu wamfica eyedwa.
Kubikwa umamangala esefikile wathi ama-guava kasekho kungakho uzamnika imengo andubana angene endlini wasesithi kazothatha ngoba esapheka.
Umamangala esengenile umsolwa kubikwa waphanga wavala umnyango wasemdlwengula kanye ngaphandle kwemvumo yakhe.
Ngemva kokuhlukuluzwa lokhu umamangala wathatha imengo ayeziphiwe eziyisithupha wabuyela endlini yakhe lapho afika walandisela umkakhe okwenzakeleyo.
Indaba le yabikelwa amapholisa umsolwa wabotshwa.
Umantshi ubegwebe umsolwa ukuthi ayepika iminyaka engu-15 kodwa wasemesulela iminyaka emithathu.
Umtshutshisi kulelicala bekunguMnumzana Tawanda Sigauke.
Online Reporter