Online Reporter
Mbulelo Mpofu
IQEMBU lomculo we-acapella elikoBulawayo, Udonsi Lwabapostoli, selikhuphe ingoma entsha ethi Magamba Edu kuYouTube, lihlonipha amaqhawe lamaqhawekazi alwela inkululeko yeZimbabwe.
Iqembu leli elikhokhelwa nguNqobani Siwela lidume ngokuhlanganisa indlela zesiNtu lezokholo lwamaPositoli lomdumo wengoma zembube, okwenza umculo walo uthokozelwe ngabanengi.
USiwela uthe ukukhululeka kwelizwe kumele kunanzwe mihla yonke njalo uzulu kumele akhumbule ukuhlupheka lokuzidela kwabantu abalwela inkululeko.
“Kithi inkululeko yeZimbabwe ithinta imizwa ngoba sikhumbula okwenzakala ngesikhathi sempi, ukulahleka kwempilo zabantu, igazi elachithekayo, amanxeba lobuhlungu obabhekana labaphephayo.
“Sifuna abantu bangakhohlwa ukuzidela okwenziwa ngamaqhawe ukuze siphile impilo engcono,” kutsho uSiwela.
Ingoma ethi Magamba Edu ihlanganisa isiShona lesiNdebele ngenhloso yokubonga amaqhawe elizwe, aphilayo lawedlula emhlabeni.
USiwela uthe amazwi engoma le aveza ukubonga okukhulu kulabo abalwela inkululeko.
Udonsi Lwabapostoli lwasungulwa ngoNcwabakazi ka-2020 njalo selibe lodumo emculweni koBulawayo. Lilamalunga ayisitshiya galombili.
Ngaphandle kukaSiwela, iqembu lilabanye abahlabeleli ababalisa uMakhosi Zondo, Methembe Dube, Mengezi Msimanga, Buhlebenkosi Ncube, Sengezo Ndlovu, Lindokuhle Ndlovu loBrenda Moyo.
Ingoma ethi Magamba Edu ingezelela umsebenzi waleli qembu osuqhubeke okweminyaka eyisithupha.
Ngo-2022 bakhipha idlalade elilengoma eziyisitshiya galombili, elilesihloko esithi Ukuzisondeza Ebukhoneni, kwalandela ingoma ethi: My Africa ngo-2023, njalo ngo-2025 bakhipha idlalade elithi Yaf’ iNkosi Yami elilengoma ezilitshumi lambili.
USiwela uthe ukukhitshwa kwengoma entsha le yindlela yokubonga amaqhawe elizwe.
“Aluba kungasibo, iZimbabwe ngabe kayisiyo esiyaziyo lamuhla,” kutsho uSiwela.
