Online Reporter
Nkosilathi Sibanda
AMANZI azasilela kwezinye indawo koBulawayo okwamalanga phose ayisikhombisa alandelayo ngenxa yokulungiswa kwezimpompi, ngokutsho kwekhansili yedolobho.
Amalokitshi azaphazamiseka kulokhu yilawo athola amanzi eMagwegwe Reservoir abalisela iMabutweni, Magwegwe, eNtumbane, Njube, eMakhandeni, Mpopoma, Phelandaba West, Lobengula, Matshobane, Luveve leGwabalanda.
Indawo ezithola amanzi eCriterion lazo zilenkinga efanayo njalo kubikwa kuzabe kungelamanzi eMganwini, Nketa 6-9, Belleview, Newton West, Nkulumane 1-5, West Somerton laseMatopo Research Centre.
“Ikhansili yakoBulawayo yazisa izakhamizi lezinye ingatsha ukuba ukuvulwa kwamanzi obekumele kwenzakale mhlaka 9 Nhlangula 2025 sekwedluliselwe phambili ngenxa yenkinga ezithile lapho okulungiswa khona,” kutsho umbiko wekhansili owethulwe ngunobhala wedolobholo uMnumzana Christopher Dube.
Kubikwa ngenkinga ezibalisela isidingo sokuthi kugejwe kutsha, kuqiniswe umhlabathi lokusilela kwempahla ethile ebaluleke kulumsebenzi.
“Ngenxa yalokhu, ikhansili ikhangelele ukuthi umsebenzi lo uzaphela, kuvulwe amanzi phakathi kwamalanga ayisikhombisa kusukela mhlaka 9 Nhlangula 2025.
“Ikhansili yakoBulawayo iyaxolisa ngenkinga ezibe khona. Ithembisa izakhamizi ukuba kwenziwa imizamo yonke ukuthi kuqedwe umsebenzi ngokuphepha langokuphangisa.”
