Online Reporter
Nkosilathi Sibanda
IMIDLALO yeligi yeCastle Lager Premiership iyaqhubeka kulimpelaviki, sekudlalwe imidlalo engamatshumi amahlanu kulisizini.
Amaqembu avela kukhefu elincinyane kulandela ukumiswa kwemidlalo kuvulelwa ukuthi iqembu lelizwe amaWarriors adlale eyobungane leNiger leBurkina Faso kunye lakumkhankaso wenkezo yeCOSAFA.
Njengoba amaqembu ephenduka emsebenzini, abaqeqetshi baphethe umthwalo wokuthi balungiselele ifasitela lokuthengwa kwabadlali kusekela mhlaka 1 kusiya mhlaka 31 Ntulikazi. Amanye aseqalisile ukudinga abadlali.
Kulindwe imidlalo yangempelaviki, kuzakhangelwa umbango wesicoco seGolden Boot, leso esiphiwa umdlali oyabe ehlohle amabhola amanengi ukwedlula abanye.
Okwakhathesi abadlali abahamba phambili ngokuligaxa entanjeni nguBilly Veremu oweMWOS loWashington Navaya oweTelOne. Bobabili sebehlohle amabhola ayisitshiya galolunye. Abadlali laba bazafuna ukuthi badlalele ukuhlohla ukwedlula amabhola alitshumi lasikhombisa ahlohlwa nguLynoth Chikuhwa ngesizini edluleyo.
Imidlalo isasekhona, okuyikhona okungabanikeza ithemba lomdladla wokuqhubeka besenza ngcono.
Abalandeli bomdlalo bazalinda ukubona ukuthi kulisizini ukhona na umdlali ozedlula umuyi Norman Maroto, owahlohla angu-22, ngesizini ka2009, edlalela iGunners.
Kusenjalo, ngoLwesibili amaWarriors azadlala leMozambique. Iqembu linqotshwe yiSouth Africa 2-0 ngempelaviki, okutsho ukuba zimbi indaba kulumkhankaso kuqembu lakuleli.
KumaWarriors akhethwe kumidlalo yobungane eMorocco, kukhangelelwe ukuthi adlale leNiger ngoLwesibili, ngemva kokunqotshwa 2-0 yiBurkina Faso.
