Online Reporter
NguLangalakhe Mabena
UMCULI womculo wezokholo uEverton Mlalazi usephinde waphakamisa igama leZimbabwe ngemva kokwenza kuhle emkhosini wokucindezelwa kwe-Spirit of Praise 12 (SOP12), omunye wemikhosi emikhulu njalo ehlonitshwayo yomculo wokholo e-Africa.
Ukucindezelwa kweDVD le-albhamu le kwenzelwe eSunBet Arena, Time Square ePitoli mhlaka 18 Ntulikazi, lapho obekulabantu abazinkulungwane abavela emazweni eSouthern Africa bezokhonza lokudumisa uNkulunkulu.
UMlalazi ucule labanye abaculi abadumileyo bomculo wokholo abagoqela u-Omega Khunou, uDumi Mkokstad, uTakie Ndou, uNothando Hlophe, uMthunzi Namba loSindi Ntombela. Ucule ingoma ezimbili, Uyingcwele kanye lethi Ngabe Safela Endleni.
Ekhuluma ngemva komcimbi, uMlalazi uthe kuyintokozo enkulu ukuphinda amele iZimbabwe kulinkundla ehlonitshwayo.
“Umfana weTsholotsho uphinde wema enkundleni yeSpirit of Praise 12, njalo ngizizwa ngihlonitshiwe kakhulu. Sibe lesikhathi esihle ngesikhathi sokucindezela, ngiyabonga kubo bonke abafike bazokhonza lathi. Uthando lwenu lokungisekela kwenu kwenze loluhambo lwaba yimpumelelo,” kutsho uMlalazi.
Kuzizalwane zeZimbabwe ezihambe umango zisiza eSouth Africa ukuyabukela ukucindezelwa kweSOP12, ukuvela kukaMlalazi kube kuhle kakhulu ngoba zizizwe zigcwala intokozo kanye lokuziqhenya ngaye.
Othanda umculo wokholo uCraig Tsepo Ntuliki uthe ukubona uMlalazi, obenguye yedwa umculi weZimbabwe obekuhlelo lolu, kumenze wazizwa eziqhenya.
“Umoya ubumuhle kakhulu. Abantu bebevela ezindaweni ezitshiyeneyo bezokuba yingxenye yeSOP12, okutshengisa ukuthi umculo wokholo uhlanganisa abantu. Ukubona uMlalazi emele iZimbabwe enkundleni enkulu kangaka kungithokozisile. Ucule ngokuzethemba, watshengisa ukuthi ungomunye wabaculi bomculo wokholo abahamba phambili e-Africa,” kutsho uNtuliki.
Omunye wabalandeli bakhe, uMayibongwe Khuboni Maseko, ohambe esuka koBulawayo, uthe uselesikhathi elandela uhambo lukaMlalazi kuSpirit of Praise, njalo ukholelwa ukuthi lokhu kube yikubonakala kwakhe okuhle kakhulu.
“Ngemva kwempumelelo yohambo lweSpirit of Praise olwedluleyo, bengisazi ukuthi iSOP12 izaba ngumcimbi ongasoze ukhohlakale, yikho nginqume ukuya khona. Ukubona uMlalazi ecula labaculi abadumileyo abanjengoMthunzi Namba kungigcwalise ngentokozo lokuziqhenya. Ingoma yakhe ethi Ngabe Safela Endleni yaba ngenye yezagqama ngalobobusuku. Ngiyaziqhenya kakhulu ngokukhula kwakhe kwezomculo,” kutsho uMaseko.
Kusukela esiba yingxenye yeSpirit of Praise, uMlalazi usebe ngomunye wabaculi abahlala bemenywa kuzinhlelo zabo zokuhamba lokucindezela, okuqhubeka kuphakamisa igama leZimbabwe kumculo wokholo emazweni e-Africa.
