admin
Thokozile Mbedzi
KWEHLE iyezi elimnyama esigabeni seValley eMatopo kuviki ephelileyo lapho abantu abathe beqeda umngcwabo kwabuya kwafa elinye inina ligxotshwa zimota ebezisuka esililweni leso.
Umuyi uMolly Dube oleminyaka engu-61 ugxotshwe yimota ebihamba nyovane isuka esililweni ngehola lesibili ngemva kwemini ngoLwesihlanu kuviki ephelileyo.
Ekhuluma lentatheli kaMthunywa uMnumzana Mabandla Zulu uveze ukuthi insindabaphenduli le yenzakalele endaweni yeLushumbe emgwaqweni weGwanda lapho abathe sebefika emqansweni enye yezimota ebezilandelana zisuka esililweni yaswela imiqobotsho yasisiyagxoba uDube.
“Abantu babehamba bevela emngcwabeni lapho abathe sebesemqamsweni enye yalezimota yaswela imiqobotsho yabuyela emuva.
“Abanye abantu ababesemoteni eyayisemuya beqa baphuma besesabela impilo zabo kodwa ngokuswelakala kwenhlanhla uDube wasegxotshwa wahle wafela lapho,” kulandisa uMnu Zulu.
“Ngilapha kangilamathe kambe singakaphozisi ngitsho lamaseko sivela beka omunye nanko sisendleleni omunye laye sesedlula ngengozi,” kutsho uMnu Zulu. Omunye wabomakhelwane ongazange athande ukuba atsho ibizo lakhe uthe kungabe kukhona okutshaya amanzi kumuli le.
“Mina ngokubona kwami ngibona engani kukhona ukuhlungwa okukhona lapha ngoba abantu bayahamba ezimfeni kusakwamalanga kodwa asikaze sikubone okunje,” kulandisa omunye wabomakhelwane . Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe sebelwamukele njalo ukhuthaze uzulu ukuba nxa elohambo alungisise imota ukuze enqabele ingozi.
Online Reporter