admin
Thokozile Mbedzi
KULEJAHA leMacingwane ePlumtree elitshiye izakhamizi zesigabeni lesi sithithibele kulandela ukugalula lincintisana labanye ukubhukutsha ngeviki ephelileyo.
Umuyi uPanashe okungasatholakalanga isibongo sakhe ugalule ngoLwesine kuviki ephelileyo ngesikhathi elamanye amajaha amabili.
Kubikwa uPanashe ubeyintshantshu kwezokubhukutsha esigabeni lesi.
Ekhuluma lentatheli kaMthunywa uMnumzana Nkanyiso Mlotshwa uthe ngalelolanga uPanashe watshona ebhukutsha encintisana lamanye amajaha.
“Ngilokudana okukhulu ngesiga esisehleleyo njengezakhamizi ngoba uPanashe utshone ezibhukutshela edamu labanye encintisana labo abanye sebehlulwe yikho ukusuka sebebuyela emakhaya, yena wasala lamajaha amabili uMayibongwe lo Craig lapho asala njalo elokhu elesilokozane sokubhukutsha.
“Ngalesosikhathi watshela abafana labo ayelabo ukuba usezabhukutsha esuka ekucineni asiyafika njalo ekucineni abanye bakhe bambukela yikho lapho athe engafiki ekucineni kwedamu wagalula,” kulandisa uMnu Mlotshwa.
Uqhubekele phambili esithi njengabadala bathi befika bazama ukukhipha emanzini kodwa behluleka.
“Abadala sathi sifika kwasehlula ukuba simkhiphe yikho ukubikela kwethu amapholisa walala khona edamu waze wakhitshwa ngelanga elilandelayo.
“Asazi sibili ukuthi wayevele elokhu efunelani ukubhukutsha yena etshone ilanga lonke ebhukutsha ewancinta amanye amajaha,” kutsho uMnu Mlotshwa.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe abadala kumele bananzelele abantwana bengaze badlalela emanzini.
Online Reporter