admin
YiNtatheli kaMthunywa
Ukuthanda imali kuyimpande yakho konke okubi!
Lokhu yikho okwenzakale kusehlakalo esenziwe nguKhumbulani Ndlovu ogwaze abangane bakhe ababili kwafa oyedwa, kubangwa ukuthengiswa kwezitina e-York Village, eMsudu, eFilabusi.
Amapholisa, ebika ebulenjini ku-Twitter @PoliceZimbabwe, athe adinga usizo kuzulu oluzaphathisa ukuthi kubotshwe uKhumbulani Ndlovu odliwe nguswenya ngemva kokudala icala leli.
“Amapholisa e-Fort Rixon acela labo abangaba lolwazi olungaphathisa ekubotshweni kukaKhumbulani Ndlovu odingwa ngoba elecala lokubulala lokugwaza e-York Village, eMsudu mhlaka 9 Mpandula,” kutsho amapholisa.
“Umetheswacala wayetshaya izitina wasuka wagwaza labo ayesebenza labo ngengqamu kulandela ukuxabana ngokuthi izitina lezi zizathengiswa njani.
“Ogwazwe kuqala, oleminyaka engu-23 yokuzalwa ufe ngalelo langa, kuthi omunye oleminyaka engu-27 yokuzalwa wagijinyiselwa esibhedlela se-Filabusi Hospital lapho alokhu eselatshwa khona.
Online Reporter