admin
Cornelius Luphahla
KULANDELA udaba lwentombazana yesigabeni seSizinke eLupane exotshwe ngeyinye indoda emsebenzini ngemva kokubulala igundwane okubikwa belihlanza imali kubikwa intombazana le ife kabuhlungu ikhukhumala isisu lekhanda.
Isiga lesi senzakale ngoLwesihlanu kuviki ephelileyo lapho uNkosazana Lindiwe Ndlovu ofe sekhukhumele isisu lekhanda ekhala ngegundwane alibulala koMnumzana Muzobanzi Mpala lapho ayesebenza khona.
Kuzwakale ukuthi igundwane leli lalihlala emganwini wesigodo lisebenza ukuhlanza imali njalo izisebenzi zikaMnu Mpala zazingahlali ezixotsha nxa zithe zalibona.
UMnumzana Thabani Moyo oyisakhamuzi sakule indawo uthe isigaba sonke siyakwazi ukuthi uMnu Mpala ubelegundwane elihlanza imali njalo abantu bayakwazi ukuthi nguye obulele uMaNdlovu.
“UMpala sokusaziwa ukuthi ubelegundwane okuthiwa lihlanza imali njalo zonke izisebenzi zakhe uyazixotsha zingalibona. Okwenza sikholwe ukuthi igundwane lihlanza imali yikuthi uhlala elemali enengi kodwa isitolo sakhe ayelaso sesavalwa. Kuthi kunjalo engaba lesikwelede sakho kakubhadali ngemali ukupha isifuyo okutsho ukuthi imali yakhe ilokunye.
“Kule indawo kakho ongakwaziyo ukuthi uMpala nguye owabulala uMaNdlovu ngoba wathi ngemva kokubulala igundwane lakhe wezwakala ekhuluma ethi obulele igundwane lakhe uzazibonela,” kutsho uMnu Moyo.
UMthunywa uxhumane loMnumzana Mlungisi Ndlovu uyise kamuyi uMaNdlovu wathi umntanakhe ubulewe nguMpala njalo uzazibonela ombuleleleyo.
“Umntanami kuliqiniso sibili ukuthi ubulewe nguMpala ngoba wayemsebenzela wasebulala igundwane engazi ukuthi ngelobuthakathi. Ngemva kwalokho uMpala wamtshaya wamxotsha ethi kungani ebulele igundwane lakhe ngakho uzazibonela.
“Kuthe ngemva kweviki umntanami wagula ekhukhumala isisu lekhanda ethi ubona igundwane likaMpala waze wafa. Isimanga yikuthi uMpala kazange wabuya emfeni lakhathesi kakangikhulumisi. Ngalokhu-ke uzabona laye njengoba ebulele umntanami,” kulandisa uMnu Ndlovu.
UNkszn Lilian Nkomo ongunina kamuyi ebuzwa ngale indaba uthe kakenelisi ukukhuluma ngendaba le usakhalela umntanakhe.
“Mina okwamanje kangikenelisi ukukhuluma ngokubhubha komntanami ngoba ngisezwa ubuhlungu kakhulu ngoba umntanami ufe ngendlela ebuhlungu ngakho ngisamkhalela,” kutsho uNkszn Nkomo.
Ebuzwa ngale indaba uMnu Mpala uthe kuliqiniso ukuthi waxotsha uMaNdlovu umsebenzi kodwa kakwazi okumbuleleyo njalo okwenze wangayi emfeni yikuthi abantu bathi nguye ombuleleyo.
“Kuliqiniso ukuthi ngaxotsha uMaNdlovu emsebenzini kodwa kangikwazi ukuthi ubulewe yini njalo ngamcina mhla ngimxotsha emzini wami. Okwenza ngangayi emfeni yakhe yikuthi abantu bathi yimi engambulalayo ngakho bengisesaba ukuthi bazafika bengitshaya mina ngingazi lutho,” kuphetha uMnu Mpala.
Online Reporter