admin
BAKAMALANDELA lina bezinyane lesilo kule iviki sizake sincokole kancane sikhumbule oNdukuzibomvu amajaha omkhonto ukuthi ayehlanganisa njani izifuyo zabo njalo kungani kwakungavamanga ukuthi zidliwe yizibanda.
Lapha-ke kwakusenziwa imithanithani ethile etshiyeneyo njalo indoda yayizibonela amaqhinga okukulungisa lokhu.
Kwakuthi nxa indoda ithame kuhle esibayeni kanye lezifuyo zayo wawungeke uzwe kuthiwa izifuyo zidliwe yisibanda kumbe zihamba zehlukene.
Kulezinsuku ezinye uthola indoda endala iphelelwa yizifuyo ngenxa yezibanda okusuka kudanise ukuthi kuyabe kutheni. Isimanga amadoda anjalo yiwo ozwa ethi ezamasiko kawafuni lakuzibona ngoba zithelela amadlozi njalo ngezakudala.
Kuyini ke kulezinsuku abantu sebephelelwa yizifuyo ngenxa yezibanda kuthi ezinye zintule leganga uzwe kuthiwa kulezifuyo ezithengiswa nguHulumende ezingaziwayo ukuthi ngezangaphi.
Kambe wawungakuzwa ngaphi ekadeni ukuthi izifuyo ziyanyamalala zingaziwa lalapho ezaya khona. Lokhu kwakungamangalisa uzulu kuthiwe yimihlola uqobo.
Ngakhona kwakungabe kuhlola ngoba abantu babengakwazi ukuthi kuyenzakala lokhu ngesikhathi kusagiywa ngoludala kodwa khathesi sokuyinhlalayenzeka.
Abanye abantu sebezinothele ngenxa yokuthenga izifuyo lezi eziyabe zingaziwa njengoba ziyabe zitshiphile. Lokhu kudala ukuthi umuntu enelise ukuzithenga zibe zinengi ahle azinothele nje ngasikhathi sinye.
Kwakuthi nxa indoda ifuyile kuthi noma izifuyo zayo zilele eguswini ingaze yatshaywa luvalo ngoba isazi ukuthi ivitshe yagalela esibayeni.
Noma nje izifuyo lezi zazingahlangana lezibanda kwakuthunqa uthuli lothudlala isiphetho lehlulwe ibutho lezibanda. Kwesinye isikhathi wawuthola isibanda sithe daca laphaya sigwazwe zinkabi kungabi ndabazalutho.
Kwakuthi nxa inkomo zisehlukana kakhulu indoda ithathe ihlolanyama ilomise isuka lapho ithathe induna yamatshithitshi iyihlanganise lehlolanyama leli. Ngemva kwalokho izathatha inkunyana zogagu ibase umlidlwana phakathi kwesibaya inkomo ziphakathi kuntambama.
Umlilo lo uzathi nxa sulamalahle kuthiwe vu ihlolanyama leli kanye letshitshitshi leli kuthunqe intuthu kube nzima.
Kusenziwa lokhu umfana uzagamula umgoqo wesihlahla somvagazi awufake esangweni ube ngowakuqala kulayo yonke. Umgoqo lo kawukhitshwa esibayeni lapha ngoba ugcine njalo ukuthi kungaze kwachitheka igazi lezifuyo noma zisemangweni.
Ihlolanyama leli elitshiswe lapha kayisilo lodwa phela elihlanganisa izifuyo kodwa kukhona njalo eminye imitshana egejelwa lelinye ihlolanyama phakathi laphakathi kwesibaya.
Imithi le ngizayiziba kancane ngingaze ngayibetha ngamagama njengoba kuyisikhumbuzo nje lapha ngempilo yasendulo.
Okunye njalo kwakuthi nxa indoda ifuna inkomo zayo zingaze zahlaselwa yizibanda eguswini yayithatha inzipho zengwe lezesilwane izihlanganise izigoqele ngesikhumba senkomo emnyama.
Ngemva kwalokho izathatha impande zika vikavika izihlanganise lalezinzipho ikugebhele phakathi kwesibaya.
Isuka lapho izabethela umkhonto ophuma emvuthweni uhlabe phezulu kwalezi nzipho utshone nya ungakhanyi ngitsho langesilanda. Lapho-ke nxa siyenze njalo iyabe sivitshe yagalela ngoba phela izibanda lezi zizathi zibona izifuyo inzipho zazo zitshelele zimane zehluleke lokuzisondelela.
Kukhona njalo izibanda ezifana lamadlelaphezulu lempisi ezingasebenzisi inzipho ekuhlaselelni izifuyo. Lezi-ke zivikelwa ngendlela eyehlukeneyo lezinye njalo yizo ezivame ukuhlasela izifuyo.
Angithi nje abanye basebenzisa izikhumba zazo kuthi abanye bavele bazithathele ulinda, ulonyovu, kanye lezinye izibungu ezilumayo bavitshe ngazo ezibayeni zabo.
Bengenza njalo kasikho isibanda ongezwa kuthiwa sidle isifuyo sakhe. Kwakunjalo-ke endulo okhokho bethu besaziphilela kamnandi kungekho okubakhathazayo ezifuyweni zabo.
Ungaxhumana lomlobi ku 0775722298 kumbe i-WhatsApp ku 0737771317.
Online Reporter