admin
Ethel Ncube
IZAKHAMIZI zeNkayi zinathisana itiye ngesiga somntwana oseleminyaka emibili wabhubha, wangcwatshwa okutholakale isidumbu sakhe singonakalanga angani ngesomuntu osanda kufa sigcinwe esiphaleni sesinye isakhamuzi kuviki ephelileyo.
Limbedumehlwana eyindaba egudwini esigabeni seJongela itshiye izakhamizi zesigabeni lesi zilesithuli nanko phela umntwana lo watholakala efile egangeni ecunywe amaphambili ngomnyaka ka2013.
Isidumbu somntwana lo, okungasatholakalanga ibizo lakhe kubikwa kasizange siphinde singcwatshwe kodwa sahle satshiswa ngoba kukholelwa ukuthi ubesetshenziswa kubukhunkuli.
UMthunywa uzwe ukuthi isidumbu somntwana lo sagejwa mhla siqeda kungcwatshwa.
Isidumbu lesi sitholakale emzini kaMaNkomo njalo kucatshangelwa ukuba yena labanye bakhe bebesisebenzisa ukuyatshontsha ukudla emzini yabantu njalo njengomatholwane.
Kuzwakale ukuba umntwana lo oseleminyaka emibili wabhubha wadojwa emaphaneni efile njalo ecuywe amaphambili.
Intatheli ixhumane lesinye isakhamuzi uMnumzana Lizwe Phuthi owayekhona mhlazana kutholakala umntwana lo esiphaleni yena seleminyaka emibili wangcwatshwa.
“Uzulu wonke wayekhona kucazululwa lindaba yomntwana abamvusa ethuneni lakhe, lami ngazibonela ngawami la amehlo. Ugogo wazivumela ukuthi umntwana lo baqala bamcuya qede badla amaphambili akhe ngendlela yokuziqinisa ukuthi bangatshaywa yizikhonkwane emzini yabantu,” kuchaza uMnu Phuthi.
“Ngimadolo nzima ngaloludaba ngoba kutsho ukuthi kunengi okwenzakalayo lapha singakwazi njengoba nje thina besisithi umntwana samngcwaba kanti abanye bamthatha bayamsebenzisa.
“Umntwana lo kuthiwa ubetshontsha ukudla njalo ubethi nxa ehamba abe lithunzi nje,” kulandisa uMnu Phuthi.
Iphephandaba likazulu likhulumisane lesinye njalo isakhamuzi uNkosikazi Sethulo Ndaba esasikhona kukhitshwa umntwana lo, oveze ukuthi kuliqiniso ukuthi umufi watholakala esiphaleni.
“Lokhe sisadidekile amakhanda ukuthi kuhamba njani ngomuyi lo. Ukumkhipha lami ngambona bemkhupha esiphaleni, umzimba wakhe uphelele ungonakala kodwa engalalo ulimi samangala. Ugogo lo wazikhulumela ngowakhe umlomo ukuthi ukuvusa abantu bakwenza bebanengi kodwa kazange aveze abanye bakhe.
“Kukhanya ubeziqinisa ngaye, kodwa basincedile sibili abaphurofethi laba ngoba kutsho ukuthi ukuganga sekuzake kube nganeno,” kutsho uNkkz Ndaba.
Iphephandaba likazulu lizwe njalo ukuthi mhlazana kukhitshwa isidumbu somntwana lo abazali bakhe babizwa ukuthi bazembona lanxa uMthunywa ehlulekile ukukhulumisana labo ngoba ucingo lwabo belungangeni.
UMthunywa ubuye wakhulumisana lalowo ocatshangelwa ukuthi ubegcine umufi esiphaleni, ugogo uMaNkomo ovumileyo ukuthi kulomntwana owacatshayo watholakala efile.
“Kubaphurofethi ngahamba sibili kodwa lokho okokuthi bengigcine umzimba womuntu owafayo ngikuzwa ngabantu.
“Umntwana lo wabhubha sibili seleminyaka emibili wedlula njalo isidumbu sakhe satholakala sicuyiwe,” kutsho uMaNkomo.
Online Reporter